MZI Inkhawmpui Minister pahnih in an hmanpui

Mizo Zaimi Inzawmkhawm (MZI) chuan nizan hmasa atang khan Berawtlang-a Tourism Multipurpose Hall-ah Inkhawmpui neiin nimin khan an pawl hruaitu tur thlanna an nei nghal.

MZI Inkhawmpui hi nizan hmasa khan Minister PC. Vanlalruata chuan hmanpuiin Sports leh entertainment tuipui tam tak awm mah ila, Mizo zawng zawng an inlungrualna chu rimawi leh zai a ni tih sawiin, “Lungngaih leh lawm ni ah te pawh mitin i nlungrual tlanna chu zai leh rimawi a ni,” a ti a. Mizo zaimite ah hmasawnna hmuh tur awm chho zel chu lawmawm a tih thu sawiin, anmahni lawm leh ngaihsan kawngah mipui lam pawhin hmasawn nachang hre thar zel turin a chah a, zaimi te hmasawnna tur leh hamthatna tur kawngah pawh sawrkar leh MZI te an tanho zel tul a tih thu a sawi bawk.

Nimin-a MZI Inkhawmpui neih chu Art & Culture Minister C. Lalsawivunga chuan hmanpui bawkin MZI-in kum 44 hmel a hmu thei chu pawl zahawm leh ropui tak a nih zia tarlangtu ni a a hriat thu a sawi a. MZI chu zaimite insuihkhawm pawl a nih mai piah lamah, thangthar zai lama tuite tana hun leh hmun siamsak tura ke pen thin, hla phuahtute, Zaipawl leh Band chi hrang hrangte chena lenna huapzo pawl a ni chu ropui a tih thu a sawi a. Zaimite chu Mizo hnam nunphunga bet tlat zai ngainatna chawilar leh, khawvel hriata pho-chhuah tlaka tihhmasawn kawnga ke penho puiah sawmin, thu leh hla chuan Sakhuana thlengin mi rilru a khawih theih avangin khawvel mit hmuhah zai mite chuan Mizo hnam chu an phochhuah theih a rin thu a sawi bawk a ni.

Nizan hmasa-a MZI Inkhawmpui-ah hian Palai lawmna neih niin Report hrang hrang ngaih-thlak a ni bawk a. Kum kalta chhunga an member boral mi 14 te sunna hun an hmang bawk a ni. Nimin-a MZI Inkhawmpui chhunzawm-ah hian MZI Website chu tlangzarhin hruaitu thlanna an nei a, he hun hmang tur hian Serchhip atang pawhin MZI hruaitute an kal a ni.