Mizoram-ah Pneumonia vanga naupang thi an tam

Naupang kum 5 hnuailam Pneumonia vanga nunna chan chu ram pum ngaihtuahin Mizoram-ah an tam hle a, za zela 19 zet a tling a ni. 

Reproductive and Child Health (RCH) State Nodal Officer Dr. Lily Chhakchhuak chuan rampuma Pneumonia avanga naupang kum 5 hnuailam thi hi za zela 17.5 a nih laiin Mizoram-ah chuan za zela 19 a nih avangin titlem turin tan lak a ngai nasa hle tih a sawi a. Tunhnaia Social Awareness and Action to Neutralise Pneumonia Successfully (SAANS) bul tanna-a an sawi danin naupang kum 5 hnuailam thihna tam ber chu Pneumonia natna a nih thu sawi a ni. Thawhlehni kha World Pneumonia Day niin hetah hian SAANS hi hawn a ni a, nakum February ni 28 khian khar a ni dawn a. SAANS-in a tum ber chu nakumah chuan naupiang sangkhat zela 3 nunna hum a ni a. Tih hlawhtlin harsa tak tura lang ni mah se tihpuitlin theih loh chu a nih loh thu a sawi a ni.

SAANS hian nau piang hlim thla ruk (6) an tlin hma a nu hnute tha taka an hnek leh thla 6 hnu a chaw tha an ei a ngai pawimawh hle a. Chu bakah nausen uluk taka enkawl a, Pneumonia an vei leh vei loh en thlithlai reng a, a hun taka enkawl chu ngaih pawimawh tur a nih thu an sawi bawk a ni.