Modi-a hnuaiah NE State te sum dawn a pung niin sawi

DoNER Minister Jyotiraditya M Scindia chuan Prime Minister Narendra Modi-a kaihhruai sawrkar hnuaiah hmarchhak State te sum dawn nasa takin a pung tih a sawi.

Niminpiah a thuthar thehdarhtute a kawmna ah DoNER Minister chuan hmarchhak State-te tana tunhmaa Annual Capital Expenditure cheng vbc. 27,000 dawn thin chu tunah chuan cheng vbc. 1,05,000 dawn a ni tawh a, hei vang hian inkalpawhna lamah pawh nasa takin hmasawnna a thleng a ni, a ti a. Mizoram in kum 2004 atanga kum 2014 thlenga sawrkar laipui atanga cheng vbc. 4,734 a dawn laiin Narendra Modi-a hnuaiah chuan kum 10 kalta chhung khan cheng vbc. 33,178 dâwn a dawng tih sawiin, Financial Year 2024-25, kum khat chhung chauh pawhin cheng vbc. 6,236 Mizoram in a dawng, a ti a. Telecom lamah pawh hmasawnna nasa tak a awm tih sawiin, Mizoram, Meghalaya leh Tripura tan cheng vbc. 430 dah a nih thu leh he sum hi State pathuma 4G Network tihmasawn nan tangkai taka hman a nih dawn thu a sawi a ni.

DoNER Minister chuan hmarchhak State ten nasa taka hma an sawn thu sawiin, Mizoram thanna tur leh Mizoram in hma a sawn nana hmathlir hrang hrang leh hnathawh mek te ngunthluk taka Chief Minister nen an sawidun thu a sawi a. DoNER Ministry-in nasa taka Mizoram hmasawn nana hna a thawh thu a sawi bawk a. Mizoram chuan khualzin hip kawngah te, ramngaw leh nungcha lama hausakna ah te, infiamna te leh huan thlai neih kawngah te theihna nasa tak a neih thu a sawi bawk a ni.

He hunah hian Chief Minister Lalduhoma pawhin DoNER Minister chu Mizoram-a a kaihhruai sawrkar ang chiaha kalphung thar duh a nih thu leh Ministry of DoNER a kaihhruai hnuah thil thar tha tak tak a tihchhuah hnem tawh thu a sawi ve bawk a ni.