Mizoram-ah Rel hmangin buhfai chawkluh theih a ni leh ta

Assam State chhung Hailakandi District-a Jamira Station bula Rel kawng chhia chu siamthat niin Mizoram buhfai phurtu Rel pawhin nimin khan Bairabi Rel Station a rawn thleng leh tawh a ni. Mizoram in State pawn atanga Buhfai a chawk-luhna kawngpui ber he Rel kawng hi kumin August thla khan tuilian leh leimin avangin a chhia a, hei vang hian Mizoram in Rel hmanga buhfai a chawkluh chu khaihlakin August 14 hnuah Rel hmang hian buhfai chawkluh theih a ni tawh lo a, thla hnih (2) chuang Rel hmanga buhfai lakluhna a khaihlak avang hian buhfai chhekkhawl sa leh FCI Kudam-a buhfai chhekkhawl sa atangin mipuite hnena buhfai sem tur hi semrual thin a ni a, Rel kawng siam hna hi ngawrh taka thawh a nih hnuah Rel kawng chhia hi siamthain nimin khan buhfai phur Rel Wagon 29 chuan Bairabi Rel Station a rawn thleng leh ta a ni.

Hetianga Mizoram buhfai chawkluhna Rel kawng a chhiat avang hian Chief Minister Lalduh-oma chuan sawrkar laipui leh Railway hotute biain Supply Minister B. Lalchhanzova pawhin Rel kawng chhiatna hmun hi a tlawh bawk a ni.