Mizoram-ah kumin hian Dengue vei 437 hmu tawh

Kumin 2024 January thla atanga September thla thleng khan Mizoram-ah Dengue vei mi 437 hmuhchhuah an ni tawh a, Dengue vei zingah mi pakhat a boral bawk a ni.

Tunhnaia Multi-Sectoral Coordination Meeting on Dengue-a tarlan danin, kumin January ni 1 atanga September ni 30 chhung khan Mizoram-ah mi 6826 enfiah atangin dengue vei mi 437 hmuhchhuah an ni a, endik zat atangin zaa 6.4 (6.40 %) te cdhuan he hri hi an lai a ni. Health and Family Welfare Department in District a then zingah Aizawl West District-ah Dengue hmuhchhuah tam ber niin mi 160 hmuhchhuah an ni a, a dawttu Lunglei District-ah mi 147 hmuhchhuah niin Siaha leh Lawngtlai District-ah mi pakhat ve ve hmuh-chhuah a ni thung a ni.

Kum khat chhunga Mizorama Dengue vei hmuhchhuah tam ber chu nikum 2023 kha niin mi 2060 hmuhchhuah a ni a, kum 2022-ah mi 1868 hmuhchhuah niin kum 2021-ah mi 83 hmuhchhuah an ni bawk a, kum 2020 ah mi 67 an nih bakah kum 2019-ah mi 131 hmuhchhuah a ni bawk.

Multisectoral Coordination Meeting on Dengue ah hian Mizorama Dengue natna hluar zel laka inven dan tur leh Dengue um bo tura hmalak dan tur sawiho a ni a, Mizoram dinhmun tarlan niin hmachhawp hrang hrang sawiho a ni bawk.