Kumin December thla thleng inthiarna siamtute hun pe

Eklavya Model Residential School (EMRS) Tlangnuam-a Hmeichhe Hostel-a inthiarna mumal lo leh zahawm lo taka siam nia sawi chungchangah Social Welfare & Tribal Affairs Minister Lalrinpuii chuan, hna hi thawh zawh a la ni lo a, Contractor-te hi kumin December thleng hun pek an ni tih a sawi.

Nimin-a thuthar thehdarhtute a kawmna ah zawhna chhangin SW&TA Minister Lalrinpuii chuan, EMRS Tlangnuam hi hna kal mek, December-a thawk zo tura hun pek a nih thu a sawi a. Girls Hostel Toilet hi drawing-ah partition awm tura tih ni mah se, Estimate-ah a siamna tur sum ruahman tel a nih loh avangin Contractor hian heti hian a lo chawlhsan mai niin a sawi.

Eklavya Model Residential School (EMRS) Tlangnuam hi amah pawhin a tlawh tawh thu leh inthiarna ah hian partition siam a, pipe kal vel pawh inhnawh a awm lohna'n en tha leh tura tih an ni tih Minister chuan a sawi a. Zirlaite erawh a tulna avangin a rem dan ang anga luh tir an ni rih tih a sawi a. Mizoram State Project Monitoring Committee chuan tunhnaia hnathawh an endikna ah EMRS Tlangnuam hi tlawhin, Hmeichhe inthiarna mumal lo leh zahawm lo taka awm hi an hmu a. A kawngkhar pawh a quality a tha lo nia sawi a ni bawk.