Pension hrang hrang pekchhuah a nih thu sawi

ZPM Thalaite chuan Tar Pension, Hmeithai leh Rualbanlo pension la te tana sum ruahman chu Bank-ah dahluh fel a nih thu an sawi.

Nimin a thuchhuah an siamah ZPM Thalaite chuan DSWO, Aizawl West hnuaia Tar Pension, Hmeithai leh Rualbanlo pension la, MRB Bank Account nei zawng zawngte chu Nov. 11, 2024 khan an puala hamthatna awmte sem turin Bank-ah dahfel a nih thu an sawi a. Tun tumah hian April 2024 atanga September 2024 thleng atan ruahman a nih thu sawiin, State Bank of India-a Account nei te pawh nimin khan dahluh fel tura ruahman a nih thu leh tunkar tawp-ah emaw, kar thar-ah emaw an Account-ah a luh beisei a nih thu an sawi a ni.

ZPM Thalaite chuan Hmeithai, rualbanlo leh Tar chaklo zawkte'n an dikna chanvo, an puala hamthatna awmte an hmuh ngei theihna tur leh Tar Pension pawh tihpun anih tur thu Chief Minister Lalduhoma'n a lo sawi lawk tawh ang ngeia a taka hmalakna chak tak kan hmu chu lawmawm an tih thu an sawi a. “Thu mai nilo, a taka thawk thin Chief Minister Pu Lalduhoma leh a kaihhruai ZPM, mipui sawrkar kan nei hi ram mipui tan a thlamuanthlak takzet a ni,” an ti bawk.