Hnathawktu tha kan neih theih nan Department tinah Service Review Committee kan dintir - Chief Minister

Chief Minister Lalduhoma chuan hnathawktu tha kan neih theih nan Department tinah Service Review Committee an dintir thu sawiin, Sawrkar hnathawk te chu Pawl leh kohhran lamah inhman dan tawk an thiam a that thu a sawi bawk.

Mizoram Secretariat Service Association (MSSA) ten nimin a Conference vawi 19-na Administrative Training Institute Auditorium-a an neih a hmanpuina ah Chief Minister Lalduhoma chuan Kalphung tha zawk duha lo au thin an nih ang ngeiin an sawrkar chuan mipuite tana rawngbawlna tha lehzual siam tumin hmalakna a nei ta nual tih a sawi a. “Heng ah te hian sawrkar hnathawkten tha taka min thawhpui kan beisei,” tiin “Hnathawktu tha kan neih theih nan Department tinah Service Review Committee kan dintir bawk a. Hnathawk thei lo emaw, thawk tlak lo te dap chhuak a, a tul anga dan anga insingsak kan tum a ni. Sawrkar hnathawkte service quality a that hian kan ram quality a tha dawn a ni,” a ti bawk.

Chief Minister chuan Pawl leh Kohhran lamah sawrkar hnathawkte an inhman nasat lutuk hian an nitin hna in a tuar ve thei tih pawh sawiin, “Inhman dan tawk kan thiam a tha. Thawhpuite kep ngai reng, mahni thawhna hmuna hmuh harsa tak kan ni ang tih te hi a hlauhawm. Kan hna hi kan rawngbawl nana Pathian min hunna a ni a, kan ngaipawimawh ber tur a ni,” a ti a. “Information Technology a thang chak em em a, kan nunphung a thlak nasa a. Sawrkar pawhin hei hi hman tangkai kan tum,” a ti a, Mipuite tana awlsamna thlen zawng zela kal an duh thu leh Sawrkar hnathawkte chu Technology thang zel mila an inbuatsaih ve a ngai tih hre reng turin a chah bawk.

Reilote sawrkarna an chelh chhungin Service Association ho te a hmu kim deuh vek tawh tih pawh Chief Minister chuan sawiin, “Service rivalry hi a nasa hle mai tih ka hmu. Hei hi tihdal ka duh. Thawhho vek kan ni a, kan hnain a tuar ang tih ka hlau thin. Tuihnar pakhat ringza vek kan ni a, in chanvo hi a awm zel dawn tih hre tlang ang u,” a ti a. An hnuaia thawkte Welfare an ngaituah tawk lo thin nia a lan thu paw sawiin, “Kan hnathawk hnuaihnung lam te hmathatna hi i ngaihthah lovang u, Post ruak hnawhkhah kawngah pawh a hnuailam a kawrawng lutuk niin kan hria. Hei hian nakin zelah harsatna min siam thei a ni,” a ti a. Sawrkar Flagship programme, Handholding chu ngaih-pawimawh hmasaa lo nei zel turin a chah bawk.

Mizoram Secretariat Service Association (MSSA)-ah hian an President Betsy Zothanpari Sailo pawhin thu sawiin an pawl chu kum 2004-a ding tan a nih thu leh Mizoram Ministerial Service atanga Group A chin te Unit hrang anga kalta an nih thu a sawi a. MSSA hian tunah hian Sanctioned post 260 neiin Officers Member 261 an awm mek a ni.