NCST in nakum-ah Mizoram rawn tlawh an tum

National Commission for Scheduled Tribes (NCST) Member Nirupam Chakma chuan NCST Full Commission in nakum January thla tawp lamah Mizoram an tlawh tum thu a sawi.

Social Welfare, Tribal Affairs and Women & Child Development Department hotute leh Department-a thawk dangte nen niminpiah-a State Guest House, Chaltlang-a an inkawmna ah NCST Member Nirupam Chakma chuan NCST chu India Danpui hnuaia Scheduled Tribes te an dikna leh chanvo an dawn tur leh hengte humhalha enzui turte leh kawng hrang hranga an hmasawnna chungchanga Sawrkar laipui thurawn petu atan din a nih thu te a sawi a. Heng bakah hian ST te chunga tihduhdahna emaw hleilenna emaw a thlena palha NCST thuneihna chungchangte pawh sawiin, NCST Full Commission chuan nakum January thla tawp lamah Mizoram an tlawh duh thu leh hemi chungchanga ruahmanna te chu uluk taka siam nise a duh thu a sawi a. Commission in Mizoram an tlawh hunah Review Meeting bakah Press Conference leh NGO te nena inkawmhona leh Autonomous District Council pathum te tlawh hun pawh buatsaih nise tiin kawng hrang hranga Mizoram ST ten hma an sawn nan National Scheduled Tribes Finance and Development Corporation (NSTFDC) leh Tribal Cooperative Marketing Development Federation of India Limited (TRIFED) hman tangkai dante dap turin a chah bawk a ni.

Nirupam Chakma hi kumin March thla khan National Commission for Scheduled Tribes Member atana lakluh niin tunah hian NSCT ah hian Chairperson bakah Member 3 an awm mek a. Nimin-a Department a thawktute nen an inkawmna ah hian Department a thawkte chuan Tribal tana hamthatna hrang hrang an kalpui mekah an harsatna tawh, an duh khawp lohna leh rawtna an nei te an sawi lang bawk a ni.