Hmankhat daih Plastic zawrh te enfiah a ni

Serchhip District Bawrhsap Paul L. Khuma hovin nimin khan Serchhip khawpui chhung hmun hrang hrangah hmankhat daih, Single-Use Plastic zawrh leh zawrh loh enfiah a ni.
Plastic Waste Management (Amendment) Rules, 2021 bawhzuia Mizoram sawrkarin November ni 5, 2021-a thuchhuah a siam atangin plastic thenkhat (SUPs) hman, lakluh leh zawrh khap te hi khap a ni a. He khapna thupek zawm lo te chu Environment (Protection) Act, 1986 hnuaia section 15-na tlawh-chhanin kum 5 thleng lung In tan emaw, cheng nuai 1 chawi emaw, a pahnih hmanga hrem theih an ni a, thupek zawm lova bawhchhe chhunzawm zel chu nitin Rs. 5000/- chawitir theih an ni.

Nimin-a Bawrhsap hova thawkchhuak te hian hman khat daih plastic leh polythene engemaw zat dawr-a an zawrh laite chu zawrh phalloh a nih thute hrilhfiahin zuar chhunzawm lo turin an hrilh a. Environment tichhetu a nih avangin sawrkarin khapna dan khauh tak a siam thute an hrilhfiah a ni.

District Bawrhsap kaihhruaia thawkchhuak he Team-ah hian DUDO Gaston Vanlalhriatpuia leh SDC Dr. Marilyn Lalruatkimi te bakah Official dangte an tel a ni.