Governor in India ram fangtu Raj Bhavan-ah a lawm

Mizoram Governor Dr. Hari Babu Kambhampati chuan khawvel sik leh sa inthlak danglam mek zel kara boruak thianghlim leh hrisel neih pawimawhna auchhuahpuia India ram State 28 leh Union Territory 5 te Thirsakawr hmanga tlawh chhuaktu Vanlallawmzuala Varte (Lz Varte), Mission Veng, Aizawl hmuahna leh lawmpuina hun chu nizan hmasa khan Raj Bhavan Banquet Hall-ah a buatsaih a, Governor hian a lawmpui zia lantir nan Momento leh Rs. 10,000/- a hlan a ni.

Governor Dr. Hari Babu Kambhampati chuan thuchah pawimawh tak kenga Thirsakawr hmanga inkhalha India ram State 28 leh UT 5 te fanga zirtirna petu Vanlallawmzuala Varte inpekna leh taimakna chu chhuanawm a tih thu sawiin, dam leh hrisel taka Mizoram a lo let leh chu lawmawm a tih thu a sawi a. Chak tak maia sik leh sa a inthlak danglam zel chu veiawm a tih thu leh inzirtirna zau zawka kalpui a tul takzet thu sawiin, boruak thianghlim neih pawimawhna inzirtirna campaign hmanga Vanlallawmzuala Varte thuchah leh zirtirna kente chuan rah tha a chhuah ngei a beisei thu a sawi a ni.

He hunah hian  Vanlallawmzuala Varte chuan All India Tour a neih chhunga a hun tawn leh harsatna paltlang hrang hrangte Governor hi hrilhin, a kalna hmun hrang hranga mipuite leh Official-te thlawpna a dawn avangin lawmthu a sawi a. A hmalaknate Governor-in a hlut sak avangin lawmthu a hrilh a. A zinna atanga a thil tawn leh hriat hrang hrangte hmuh theih tura dahkhawmna lehkhabu a hlan a ni.