Electronic Waste thehthang mai mai rem lo

Mizoram Pollution Control Board (MPCB) chuan Electric hmang bungraw hluihlawn tawh te duh duh dana thehthang chu sawrkar dan kalh a nih thu an sawi.

Mizoram Pollution Control Board Scientist ‘C’ Dr. Lalramnghaki Pachuau chuan Electronic Waste a telh theih Mobile Phone, TV, Fridge, Washing Machine leh a dangte chu mihringte bakah thilnung dangte hriselna atana hlauhawm an chan theih avangin bawlhhlawh dangte anga thehthang mai lova a hranpa a fimkhur taka thehthang a ngaih thu a sawi a, Sawrkar laipui pawhin hemi chungchangah hian dan khauh tak a zam thu a sawi bawk. 

MPCB chuan Electronic Waste thehthang chungchangah mipuiten fimkhur tak leh uluk zawka heng bawlhhlawh te hi kan thehthang a ngaih thu an sawi a, heng Electronic Waste-te hi Central Pollution Board-in a lakhawmtu tura a ruat, anmahni a in register Collection Center-te hnenah chauh thehthang tur a nih thu sawiin, Mizoram-ah pawh Collection Center pahnih Caro Samba Falkland Aizawl leh Hula Deb Tlangnuam Aizawl-ah te a awm thu an sawi a. Electronic waste reclycling titute hian MPCB nena tangkawpin mipui zirtirna pawh hmun hrang hrangah an kalpui mek a, anni hian electronic waste hrang hrangte an dawng zel thei a ni.