Churches Council of Mizoram leh Zoram Thar

Churches Council of Mizoram leh Zoram Thar

- Rev. Dr. Zaichhawna Hlawndo

Zofâten kan nghahhlelh êm êm, mi tam tak ten tawngtainaa bang lova an lo thlen leh Kohhran hruaitu leh Lalpa tana mi thahnemngâi ten an vei êm êm hlawhtlinna a lo thleng ta! CCM hi Mizoram Kohhran Pawl hrang pariat (1) Presbyterian Church of India (2) Baptist Church of Mizoram (3) Evangelical Church of Maraland (4) Lairam Isua Krista Baptist Kohhran (5) Evangelical Fellowship Church of India (6) Wesleyan Methodist Church (7) Independent Church of India leh (8) Isua Krista Kohhran (Bualpui NG) inzawmkhawmin a din a ni. CCM hawnna Inkhawmpui hi October 26-27 khan Aizawl Mission Veng Presbyterian Kohhran Biak Inah neih a ni. CCM hruaitute chu :- President Rev. R. Lalbiakliana, Vice President Rev. B. Zazawna Lai leh Rev Lalrodinpuia LS Nghaling, General Secretary Rev R. Lalhmangaiha, Joint Secretary Rev. T. Salaw, Treasurer Upa R. Lalmalsawma, Finance Secretary Rev Jessai L. Neitham te an ni. CCM Executive Committee Member mi 50 ruat an ni a, chungte chu – PCI-17, BCM-10, ECM-7, LIKBK-5, EFCI-5, IKK (Bualpui NG)-2, ICI-2, leh WMC atangin.

Lalpa Pathian in England-ah rawng ka bawl laiin ‘I pianna ramah kir tawh rawh Zoram Thar ka din dâwn’ tih min hriattir a. Nehemia Jerusalem kulh chim rem rum din thar lehna tura kohna ang a ni tih chiang takin Pathian Thlarau Thianghlimin March 12, 2012 zing dar 3:00 velah khan min hriattir a. Chu kulh chim rem rum siam that ngai leh siam that dan turte pawh min hriattir a. Chu Pathian kohna aw chiang lutuk chu hnial theih leh hnial ngam chi pawh a nih loh avangin kan pianna ram ah chuan January, 2016 khan England rama rawngbawlna leh In leh lo kalsanin ka rawn hawng ta a ni. Zofate kulh chim rem rum din that turte zinga lian ber chu a zawn chhuah Zofa Kristian-te zinga inthen darhna nasa tak lo thleng ta hi a ni. Kum 100 kristianna kan lawm zawh meuh chuan Kohhran pawl hrang 100 dawn a lo piang ta. Zofa Kristiante chuan amah Lalpa Pathian buaipui aiin mahni Kohhran pawl hrang theuh kan buaipui a. Missionary te khan Kohhran pawl pathum- Presbyterian, Baptist leh Lakher Pioneer Mission chiah an din. Hun a lo kal zel a, Kohhran hming tlawhchhanin pawl kan din belh zêl a, a ding tawhte pawh an phel darh zel a. Kohhran chu Zofate thendarhtu, indona mual lianpui maiah a lo chang ta a ni.

Sakhuana ruihchilh hi thil hlauhawm tak mai a ni. Sakhuana ruihchilhna leh atchilhna hian mahni chhung leh khat te pawh tuithlar duhna mai pawh ni lo, thah duhna hial a thlen thei. Khawvel chanchin (history) han chhiar ila, indona chawk thotu lian tak chu Sakhuana hi a ni. Keini Zofate pawhin Kristianna hi Sakhua emaw kan ti ta tlat mai a. Amah kan Lalpa Isua khawvela lo kal chhan leh Kohhran a din chhan te chu kan kal pel mai a nilo, kan dovin kan duh lova, ama hming tho siin Kohhran pawl hrang hrang kan dinin kan indo mêk a ni. Pathian chu remna Pathian a nih laiin ama hming lam tho chunga Kohhran pawl kan din hmang chuan Setana’n Pathian mite chu min indo tir ta chiam mai a ni. Hmanah chuan hnam lungrual, a thlum a al eiza thin kha kan ni a, tunah chuan Kristianna chu Krista tana nun thianghlim, remna leh hmangaihna kalpui tur kan nih laiin Sakhuana ah kan let a, kan ram leh hnam a lo keh phel rem rum ta a ni. Tunah hian Kohhran pawl leh pawl pawh in vuah duhlo tam tak, mahni chhungte leh hnampuite pawh an sakhaw tihdan zawm ve duhlo chu enga tan mah ngailo, hmelma ang maia dah te kan pawh kan awm. Heng zawng zawng hi mihring phuahchawp sakhuana avanga lo awm a ni a, Bible zirtirna nen a inkalh tlat a ni.

Pathian in a hmangaih leh a zawnchhuah hnam leh ram hi din thar leh a duh a. Zofâte Kristian te zingah Setana chuan hem lo thlakin nasa takin min lo then darh tawh mahse min suihkhawm a, a Lal ram tana min din thar hi a tum tlat a ni. Tuna CCM lo ding ta hi a bul min tan sakna a ni a. Mi thenkhat chuan ‘An tlem em mai, Kohhran tam zawk an tel lo’ pawh kan ti maithei. Mahse tunah CCM dinna tura Kohhran pawl pariat chiah a ni hi number tha leh awmze nei tak a ni tih hi kei chu ka dawn ve dan a ni tlat. Bible-ah Pathian in lei leh van a siam dan kan hria a, ni ruk chhûngin engkim a siam zo vek a, ni sarih ni a chawl a, ni riat ni chu ni hmasa ber a ni tih a ni. Bible number chhiar dan hi a mak danglam khawp mai a, Number 8 hi a bul tanna number a ni tlat a ni. Pathian in a mite tan thuthlung a siam thin a, mahse an bawhchhiat leh thin avangin Nova hmangin thu a thlung a. Kha thu thlun pawh kha number 8 tho hmangin a thlung tih kan hria. Nova lawng lianah khan ramsa te an kawppui nen theuh a dah a, mihring a dah zat pawh kha kawpui nei pali, Nova te nupa leh a fapa pathum te an nupui te nen a ni tih kan hria. Chuvang chuan kan ram leh hnam din thar lehna tur atan Lalpan kohhran pawl hrang pariat hi tawk a ti a nih ka ring.

CCM chu Churches Council of Mizoram tihna a ni a, mahse a chhunga kan Kohhran pawl hming dah ram hmingte pawh hi ala hrang hlawm a. India ram, Mizoram, Mararam leh Lairam tiin kan kohhran pawl hming te pawh kan la vuah hlawm a ni. Hnamah kan la chian rih loh vang a ni. CCM Hawnna tawp zan inkhawm kha ka va chhim ve a. Inkhawm tan hma darkar khat kan zai a, darkar chanve kha solfa hla, hnamdang zai thlûkin kan zâi a, kan tui tlâng thawkhat viau. Lengkhawm zaiin hla an han la leh kha chu mei chhem ang ni ta se a alh hluai mai a tih mai turin Lalpa fakin kan lam ta suau suau mai a, a nuamin a hlimawm hle. Zaipawl thiam tak takin an rawn zai a, an thiam hle mai tih bak chu Thlarau Thianghlim hnathawh langsar taka hmuh leh chan tur a awm lem lo. Rev.Dr. R. Lalbiakliana, President CCM in thuchah ngaihnawm tak, kohhran inpumkhat pawimawhna leh inpumkhat loh pawina te ngaihnawm takin a sawi a. A thusawi zinga ka beng hawlh ber chu Kohhrante hi pawl hming hrang hrang pu lo hian a awm theih mai awm si a, chutiang chuan awm mai ila a tih kha a ni. Zoram Thar a lo pian hunah chutiang chuan kan la awm dawn tiin kan ram zawlneite pawhin an lo sawi a ni awm a, chungte chu a rim a nam tan a tih theih awm e.

Zofâ Kristiante kan insuihkhawm vek hun, pawl pawl ti hrang nuaih lova Lalpa Beramte huang khata kan awm hun hi Tlumtea thlirin kan thlir tak meuh a ni. Kohhran pawl hrang hrangin Pathian thu hmanga indona kan kalpui zel chuan kan ram leh hnam hi a ding chhuak dawn lo. Tunah Lalpa’n a bul min tan sak tawh ah hian Kohhran pawl dang zawng zawngte pawh tel vek hun a la awm turin i beisei tlat ang u. Hnam ropuite kan harh a, Zoram Thar a lo pian a, khawvel tana eng, hnam tinte tana eng leh khawvel pum tana tawngtaina INPUI ni tlak turin i inpuahchah zel ang u.