Bana Kaih Scheme-ah dilna 6010 lut tawh

Sawrkar Flagship Programme, Bana Kaih (Handholding) Scheme hnuaiah November 4 thleng khan Progress Partner (tanpuina dawngtu) ni turin dilna 6,010 a lut tawh a, November tawp lamah tanpuina (loan) hmu turte thlan tum a ni.
Bana Kaih hnuaia dilna te chu an project kaihhnawih sawrkar Department-te'n endika an thlitfim hnuah Handholding Scheme-a thuneitu sang ber, Apex Body - Mizoram State Policy Coordination Committee (MSPCC)-in tanpuina dawng turte a thlang dawn a. MSPCC hotute sawi danin Bana Kaih hnuaiah November 4 thleng khan Progress Partner ni tura dilna 5,010 a lut tawh a, Dilna lut tawh zinga 5,961 chu mimal dilna niin pawl anga dilna 49 a awm a, Dilna te chu an Project kaihhnawih Department tina a khawihtu Nodal Departmental Committee-in an endik mek thu an sawi.

MSPCC hotute chuan, department-te'n dilna zinga hmu tlak nia an ngaihte chu MSPCC-ah tanpuina hmu turin an rawt dawn a, Department-te chu tun thla ni 15-ah an hmachhawp thehlut phawt turin an ti tih sawiin, heng te hi tun thla tawp lamah ngaihtuah leh an tum an ti.

Bana Kaih hnuaiah hian Implementing Department 16 awmin heng ah hian eizawnna tur Trade 155 a awm a, November 4 thlenga dilna lut 6,010 zinga 2,312, za zela 38.47 chu Commerce & Industries Department hnuaia dilna a ni a; Commerce & Industries Department-ah hian Trade hrang hrang 43 a awma, Implementing Department 16 zinga Trade tam berna a ni.