All India Cooperative Week lawmna neih a ni

All India Cooperative Week vawi 71-na lawmna chu nimin khan Aizawl Treasury Square-a Lianchhiari Run-ah neih a ni a, he hun hi Cooperation Minister PC. Vanlalruata chuan a hmanpui a ni.

Cooperative Societies-a Registrar R. Lalremsanga kaihhruai he hunah hian Cooperation Minister chuan kumin 2024-a All India Cooperative Week thupui 'Role of Cooperatives in Building Viksit Bharat' tih chu thupui pawimawh tak a nih thu sawiin, India ram chu hmasawnna kawng a thang duang tak a nih thu leh chumi ruala hmasawn ve tuma hnathawh a pawimawh thu a sawi a. India ram chuan kum 2047-ah hian Developed Country dinhmun ni turin chak takin ke a pen mek thu leh hemi tihlawhtling tur hian a huho a Cooperative Society anga hmalak a pawimawh thu a sawi bawk a ni.

Mizoram sawrkar chuan kuthnathawk a eizawngtute leh thiamna leh theihna nei, miharsa te khaichhuahna turin Hand-Holding Policy a kalpui tan mek thu Minister chuan sawi bawkin, khaw 800-ah Primary Agricultural Credit Society (PACS) din a nih tawh tih a sawi a. Hengte hian tha tak a hna an thawh theihna turin Cooperation Department leh Federation zawng zawngte tanrualna leh vilpuina a pawimawh tur thu a sawi a. Kuthnathawktu chu Cooperative Society a thawh hlawk berte zing ami an nih thu a tarlang bawk a ni.

Cooperation Minister hian he hunah hian Cooperative Tlangau Special Issue a tlangzarh nghal a. Kumin-a All India Cooperative Week thupui hmang hian Government Aizawl West College Assistant Professor Dr. John C. Lallawm-awma chuan thu a sawi bawk a ni.

All India Cooperative Week hi kum 1953 khan hman tan niin kumin hian November 14 atanga 21 chhung hian ramchhung hmun hrang hrangah hman a ni dawn a ni.