Vegetable Wholesale Market sakna tur hmun tlawh

Agriculture Minister PC. Vanlalruata leh EF&CC Minister Lalthansanga te chuan Sihphir Venghlun-a Vegetable Wholesale Market sakna tur hmun nimin khan an tlawh.

Vegetable Wholesale Market sakna tur hi Sihphir Venghlun Field bulah niin, khawtlang in a sakna tur ram hi a thlawnin an pe a, Agriculture Minister chuan ZPM sawrkarin a lo aupui thin leh a ngaihpawihmawh em em kuthnathawktute tan kawl a eng chho zel tih sawiin, “Aizawl dai hnai hmun li-ah Vegetable Wholesale Market kan sa thei tur hi thil lawmawm tak a ni. A building pawh a lian tha dawn a, a hmunhma thlan kawngah pawh sawrkar a fimkhur hle,” a ti a. Building hi sak zawh a nih hunah a khaw neitu ten Society tha tak dinin an enkawl zui dawn a, Society hian building chhungah kuthna-thawktute mamawh tur, thlai chi te, hlo tur te, pipe te, leitha te pawh an zuar dawn tih a sawi bawk. EF&CC Minister leh Aizawl East-I bialtu MLA Lalthansanga chuan a bial chhunga thlai thar hralhna hmunpui tur a awm dawn ta chu lawmawm a tih thu a sawi bawk.