Lengpui Airport-ah thutlukna la siam rih lo

Chief Minister Lalduhoma chuan October 16 khan Council of Minister chuan Lengpui Airport midang kuta hlan tur leh tur loh chungchang an ngaihtuah tih sawiin, “Thutlukna siam a la ni lo,” a ti.

Nimin-a thuthar thehdarhtu ten an kawmna ah Chief Minister Lalduhoma chuan December 1998-ah Lengpui Airport hawn a nih thu sawiin, “Keimahni chauh chuan kan enkawl zawh dawn loh avangin Congress leh MNF hunlai pawhin tihral an duh. MNF sawrkar liamta khan kum 2022 khan Airport Authority of India (AAI) te nen Draft Agreement an siam a, an puitlin hmain keini kan rawn lang a ni,” a ti a. An sawrkar hnuah Working Committee siamin AAI-te pawh an biak chhunzawm ve thu a sawi a. AAI-te chuan a thlawna pek a, a hmun neih an duhthu sawiin Chief Minister chuan, “An duhdan pawm chiah kan ngai lo. AAI hian Airport tam tak an enkawl a, an enkawl seng lo. Midang kutah an hlan leh dawn. Indian Air Force (IAF) nen vawi sarih lai Working Committee-te an in dawr a, a hmunhmate an enho. Committee hian an report chu an rawn thehlut a, hei hi Council of Minister-ah ngaihtuah a ni,” a ti.

Chief Minister chuan IAF-te kuta hlan a nih chuan anni chuan a man Mizoram sawrkarah an pek tur thu sawiin, “IAF hi chuan a area insem an rawt a, Runway chin lehlam zawng an chang anga, Family Quarters bakah a bulhnai mipui chhawr theihin damdawi In leh School thlengin din an tum. Terminal building lam chu State sawrkarin a la chang anga, a Operation zawng zawng a kal dan ngaiin a kal thei dawn. Kan enkawl tur chinah chuan sen belh loin hlep pawh kan nei ve thei tura ngaih a ni a, a vaia pek tur a ni lo,” a ti bawk a. Airport Runway-in thlawhna lian leh rit a dawl zawh dan tehna - Pavement Classification Number (PCN)-ah Lengpui runway hi 36 a ni a, PCN 48 tala tihsan an duh a, chumi atan chuan cheng vbc. 50 tal a ngai dawn tih sawiin, A khat tawkin thuamthat reng a ni a, vawikhat thuamthatna atan a tlem berah cheng vbch.25 vel a ngai tih a sawi bawk.

India Hmarchhakh Airport 18 awm zingah chuan Lengpui Airport chiah State sawrkar enkawl a awm tih Chief Minister chuan sawiin, “India ram pumah Airport 335 vel a awm a, chung zingah pawh chuan State sawrkar enkawl chu Lengpui Airport chiah. State enkawl ang deuh awmchhun chu State Airport Authority dinin PPP mode-in an kal,” a ti. Chief Minister sawi danin, an sawrkar hnuah Lengpui Airport ram chin tum thum teh a ni tawh a, a zim tual tual a. “Mimal ram a tam telh telh a, dan kengkawhtu tur zawka ngaihte'n ram an lo nei. A tira mi ang chiahin kan tehfel a, kan hung dawn. Dan loa ram lo neite chuan duh leh min khing rawh se, tiin sawrkar a kal. Tun thleng chuan sawrkarin khingtu a la nei lo,” a ti.