VC Draft Bill sawiho leh a ni

Nimin khan LAD Minister C. Lalsawivunga hovin Aizawl-a Mizoram State Veterinary Council Conference Hall-ah ‘The Mizoram (Village Council) Draft Bill, 2024’ chungchanga inrawn-khawmna leh sawihona chu a tum hnihna atan neih leh a ni a. Tuna Village Council inenkawl nana kan hman mek, The Lushai Hills District (Village Council) Act, 1953 chu Mizoram UT a nih atang daih tawha hman a nih avang leh tunlai khawsakphung leh changkanna nen inhnerem lo tam tak a awm tawh avangin he dan hi ennawn a ngai tih he hunah hian sawilan a ni a. Ngaihdan hrang hrang sawiho niin kan ram mila democracy chhawmnung reng a kalpui zel ni se tih a ni bawk.

He thutkhawmah hian Drafting Committee te'n Draft Bill an siam chu uluk taka ennawnin, tih danglam ngai leh siamthat ngai te ennawn a ni a, nimin-ala tihfel hman loh chu Drafting Committee-in lo buaipui tura tih a ni bawk. He Dan hi Assembly-in a Pass hunah chu Municipalities leh Autonomous District Council huam lovin Mizoram pumah hman tur a ni ang.