State Level NCORD meeting neih a ni

State Level NCORD meeting vawi 8-na chu niminpiah khan Chief Secretary Dr. Renu Sharma IAS hovin neih a ni.

SAD Conference Hall-a he thutkhawm ah hian Chief Secretary Dr. Renu Sharma chuan drugs leh a kaihhnawih ruihhlo hrang hrang do kawnga enforcement agency-te hmalakna fakawm a tih thu sawiin, ruihhlo dotu hrang hrangte chu tha thlah lova tang mar reng turin a chah a. DC leh SP te chu ruihhlo do kawnga lungrual taka hmalak a nih theih nan leh a sawt zawk nan tawnhriat leh thu pawimawhte inhrilhhriattawn zung zung a nih theih nan anmahni District-ah theuh District NCORD meeting thla khata vawikhat tal nei turin a chah a ni. He hunah hian drugs leh a kaihhnawih ruihhlo hrang hrangte do kawnga hmalakna thlirlet niin hmalak chhunzawm zel dan turte pawh sawiho a ni a. Lalbiakthanga Khiangte, IGP (Intel) chuan Mizoram Police leh Excise & Narcotics Department te'n kumin August thla thleng khan drugs cheng vbc. 1797.2 hu an man thu a sawi a ni.