STA in rate ennawn tul an ti rih lo tih an sawi

State Transport Authority (STA) Mizoram chuan tunhnaiah khualzin phur lirthei zingah chuan-man tihsan duh awm mahse, tun dinhmunah chua ennawn tul an ti lo.

STA chuan tunhnaiah kawngpui chhia leh tuialhthei man tihsan chhuanlama khualzin phur lirthei chuanman tisang an awm ni a hriat a ni chu tha lo an tih thu an sawi a. Tuna lirthei chuanman hman mek chu kumin March ni 12 atanga hman tan chauh a ni a, thla 7 vel chauh hman a la nih avangin State Transport Authority chuan khualzin phur lirthei chuanman ennawn chu tun dinhmunah tul an tih loh thu an sawi a ni. 

STA chuan lirthei chuanman chu kalphung mumal tak nen hunbi neiin a ennawn thin tih sawiin, ennawn a nih dawnin District tina Deputy Commissioner kaihhruaina hnuaian NGO hrang hrang te, a kaihhnawih lirthei pawl leh mipui aiawh, Consumer's Union-te nen rawtna siam tir thin an ni a, chung rawtna an dawn zul zui chuan mipui tana rit lo tur leh lirthei neitute tan pawha na lo turin a man hi bithliah thin a ni tih an sawi a ni. 

STA chuan an hnena khualzin phur chi lirthei ten permit an dilna form-ah Sawrkar-in lirthei chuanman a bithliahte zawm turin an intiam sa vek thu leh permit an lakchhuah dawnah pawh Sawrkar thu zawm tura intiamin, an hming an sign leh vek bawk thin tih an sawi a, lirthei neitute chu sawrkar rate anga tlan thin turin an hriattir a. Sawrkar rate zawm lo emaw, Sawrkar duh loh dana hmala te chu an permit cancel thlenga hmalak theih a nih thu leh mipuite pawh sawrkar rate bithliah anga lirthei hmang thin turin an chah bawk.