Serchhip District Hospital sak hna chhunzawm zel turin Chief Minister in Contractor te a hrilh

Serchhip District Hospital Building thar sa tura hmalakna kal mekah Chief Minister leh Bialtu MLA Lalduhoma chuan he hna thawktu tur te chu thlamuang taka an hna thawk chhunzawm tura a hrilh thu a sawi.

Serchhip District Hospital Building thar sa tura hmalakna kal mekah hian he hna thawktu tura thlan Zamzo Construction & Consultancy Firm chuan Hospital sakna atana bultanna tur sum cheng vbc. 21 petu tur Power Grid Corporation of India Ltd.(PGCIL) te hian Chief Minister in a approved tak Hospital Drawing chu an pawm ve em tih Health Department hotute an zawt thin nia sawi niin, a chhanna an la dawn loh avangin hna an thawh thlawn lohnan sum petu tur PGCIL ngaihdan hriat phawt duhin an hna hi nimin atang khan an chawl dawn nia sawi a ni a. Hemi chungchang hi nimin zing-a PWD IB, Serchhip-a khawtlang hruaitute nen an inkawmna ah Chief Minister chuan sawi chhuakin, he damdawi In Building sak phung tur her danglam deuh (change of scope) avanga CSR petu PGCIL ngaichanga Contractor-in chawlhsan rih a tum chu thlamuang taka hna chhunzawm tura a hrilh thu sawiin, Health Minister pawh Phone-a biain a chah tih a sawi a ni.

Chief Minister chuan PGCIL ten CSR an rawn pek chu cheng vbc. 21 a ni tih sawiin, cheng vbc. 18 chu a building sakna tur leh a bak zawng chu hmanrua (equipments) leina tur a ni tih a sawi. District Hospital changtlung tak sak nan pawisa dah belh a tul avangin Serchhip District Hospital atan hian North East Special Infrastructure Development Scheme - Other Than Road Infrastructure (NESIDS OTRI) atangin cheng vbc. 65 dah belh tum a ni a. Mahse NESIDS OTRI guideline angin cheng vbc. 50 bak Hospital atan dah theih a nih loh avangin cheng vbc. 50 dah a ni ta zawk a. Hei vang hian Serchhip District Hospital sak phung tur hi thlak hlek (change of scope) tulin PGCIL lam hian rem an ti em hriat a ni ta lo a. Chief Minister chuan, “PGCIL lam ngaichanga hun lo khawh ral hi a uiawm tawh avangin sum pek tul awm apiang hi NESIDS OTRI atanga lo pek mai theih a ni a. Contractor hian thlamuang takin hna lo chhunzawm se ka duh. A tul chuan sum hi kan dap belh zel dawn a ni,” a ti bawk.

Serchhip District Hospital Building thar sa tur hian a Building hlui chu thiah fel a ni tawh a, tunah hian a hmun laih hna thawh chhoh mek niin Ban phun-a Building sak hna thawh tan hun tur erawh hriat theih ala ni lo thung.