Faina beihpui Swachhata Hi Seva kharna neiin VC Area Fai berah Serchhip Vengchung thlan an ni
Serchhip DC Pisapui Hall (DC Conference Hall)-a Swachhata Hi Seva kharna inkhawm-ah hian Bawrhsap Paul L. Khuma chuan he huna tel te Chibai bukin, Fai a pawimawhzia leh kan nunpui tur a nihzia zirtirtu ni turin a sawm a. “Faina beihpui hi nitin, kartin, kumtluanin kan hmang tur a ni a. Fai hi keimahni theuhah bul i tan ang u,” tiin kalkhawmte chu a sawm a. Kawng hrang hranga mahni hna rinawm taka thawk thin te chu an zahawm thu sawiin, mahni hna theuh ah theihtawp chhuah a pawimawh thu a sawi bawk.
Serchhip Addl. DC Lalrinzuala kaihhruai he hunah hian Serchhip-a District Urban Development Officer (DUDO) Dr. Marilyn Lalruatkimi chuan kumin a Serchhip District-a Swachhata Hi Seva hman chhunga an hmalakna hrang hrangte a tarlang a. Swachhata Hi Seva hun hman chhung September 17 atanga October 2, 2024 chhungin inelna hrang hrang buatsaih niin Serchhip khawpui chhunga VC Area fai inelna ah Vengchung Village Council chu VC Area Fai berah thlan an ni a. Hemi hun chhunga hma la tha leh hnatlang thawkchhuak tam, ‘Best Performing Village Council’ lawmman pakhatna chu Serchhip Hmar Veng VC ten dawngin P&E VC in pahnihna leh Chanmari VC in pathumna te an dawng bawk.
PHE Department buatsaihin Swachhata Hi Seva hman chhung hian Serchhip District-a Thingtlang khaw hrang hrangah pawh Faina kawnga inelna hi neih niin lawmman pakhatna chu Vanchengte VC in an dawng a, Keitum VC in lawmman pahnihna leh Chhingchhip Venghlun VC in lawmman pathumna an dawng bawk a. Serchhip khawpui chhungah a hmun lo-a bawlhhlawh paihkhawmna (Blackspot) hmun panga thlangin heng te hi VC ten an thianfai a, Blackspot tifai tha ber lawmman chu Chhiahtlang North VC ten an dawng bawk a ni.
Kumin-a Swachhata Hi Seva hman chhung hian Zirlaite tan inelna chi hrang hrang buatsaih niin High School leh Higher Secondary School-a zirlaite tana Essay Writing Competition-ah Hmingthankimi (PES) chuan lawmman pakhatna dawngin R Lalrinsiami (GEA) in pahnihna leh Vanlallawmzuala (Chhiahtlang HSS) in lawmman pathumna an dawng a. Middle School te inelna ah Vanlalhriathlui (LFCS) in lawmman pakhatna dawngin Isabella Lalmalsawmi (GEA) leh Zonunmawii Sailo (LFCS) ten pahnihna leh pathumna lawmman an dawng bawk.
High School leh Higher Secondary School zirlaite tana Painting Competition-ah Zodinpuii (GEA) chuan lawmman pakhatna dawngin V. Lawmsangkimi (PES) chu pahnihna leh K. Vanlalhmangaihthanga (GEA) chu pathumna a ni a. Middle School zirlaite tana Painting Competition-ah Lalhmangaihhlui (CMS) chu pakhatna niin Vanlalhlimpuii (LFCS) chu pahnihna leh Vanlal-rempuii (All Saints School) chu pathumna a ni bawk.
Govt. Serchhip College-a zirlaite tana Reels insiamsiak ah Youth Adventure Club chu pakhatna niin Wildlife Protection Club chu pahnihna leh Drug Awareness Club chu pathumna an ni bawk.
Swachhata Hi Seva kharna inkhawm nimin-a neihna hmun, Serchhip DC Pisapui Hall kawt-ah hian nimin vek khan thilchhia paih mai tur atanga thil tha leh hmantlak siam chhuah te pholanna hun, Waste to Art Exhibition neih nghal niin mipui ten an hlut hle a. Hei bakah hian Swachhata Hi Seva hmalakna in a ngaih pawimawh, bawlhhlawh paih fai leh thianfaitu Safai Mitra te tan pawh nimin vek khan a thlawna inentirna, Health Camp chu Serchhip DC Complex-ah neih a ni bawk.
Comments
Post a Comment