Serchhip District-ah Vawk 10,282 chan tawh

Kumin chhungin Serchhip District-ah African Swine Fever (ASF) vanga Vawk thi leh suat chu 10,282 a tling tawh.
AH&Vety Department in an chhinchhiah danin nimin khan Serchhip District-a khaw pathum-ah ASF vanga Vawk thi 8 a awm leh a, Baktawng-ah 4, Khawlailung-ah 3 leh Sialsir khua ah pakhat te an ni. Nimin vek khan khaw 4-ah Vawk 21 suat leh a ni bawk a, heng zinga 15 te chu Lungpho khuah ah niin Baktawng, Keitum leh Sialsir khua ah Vawk pahnih theuh suat a ni bawk. Heti hian kumin chhungin Serchhip District-ah ASF avanga Vawk thi chu khaw 31-ah 3390 a awm tawh a, Vawk 6892 suat ni tawh bawkin Vawk thi leh suat hi 10,282 a tling tawh a, Vawk hri leng hi chhungkaw 2076 in an tuar tawh bawk a ni.

AH&Vety Department in an chhinchhiah danin Mizoram pumah kumin chhung hian khaw 245 ten ASF avang hian harsatna an tawk tawh a, ASF vanga Vawk thi 13,723 awm tawhin Vawk 22,826 suat a ni tawh bawk a. Nimin bikah khan Mizoram pumah ASF vanga Vawk thi 202 lai chhinchhiah la awmin Vawk 28 suat a ni bawk.