Scho hmu tur CM in duhsak

Thenzawl Venghlun-a cheng Joseph VL. Ruatpuia S/o B. Lalrochhuanga (L) chu Scholarship hmingthang tak, Commonwealth Split-site Scholarship 2024 dawng tura thlan a ni a, Serchhip Bialtu MLA leh Chief Minister Lalduhoma chuan a chhuan thu leh a zir zelna turah duhsakna a hlan thu Social Media kaltlangin a tarlang a ni.
Joseph VL. Ruatpuia hi Department of Chemistry, National Institute of Technology Silchar-a PhD zirlai mek a ni a, he Scholarship a hmuh tur hmang hian Department of Chemistry, Cambridge University, UK-ah thla 12 chhung Research a chhunzawm thei dawn a. Cambridge University-ah hian Prof. Andrew EH Wheatley hnuaiah a research hi a ti ang.

Commonwealth Split-site Scholarship hi Doctoral candidate danglam bik, an background thliar lovin talent ropui leh theihna sang tak nei te hnenah pek thin a ni a. UK Foreign, Commonwealth and Development Office (FCDO) atanga sum pek chhuah he Scholarship hian history ropui tak neiin kum 1959-a din a nih atang khan Commonwealth Scholarship emaw Fellowship emaw hi researcher leh fellow 31,000 chuang zetin an dawng tawh a ni.