Rel kawng siam mek sawipui

Chief Minister Lalduhoma chuan nimin khan a Pisa-ah North East Frontier Railways (NFR) a General Manager of Construction Arun Kumar Chaudhary chu kawmin Bairabi leh Sairang inkara Rel kawng siam hna thawh mek a sawipui a. Chief Minister chuan, Rel Station approach road te chu a rang lama sial tura State sawrkarin hma a lak tur thu lo hrilhin, hmabak an neih hrang hrangte a lo zawt bawk a. Rel a service theih hunah Mizo thalaite tana hna engemaw zat a awm theih a beisei thute pawh a lo hrilh a ni. NFR General Manager hian nakum July ni 31 hmain an hnate zawh hman an tum tih sawiin, “Engemaw harsatna danglam bik a thleng a nih loh chuan kan zo hman ngeiin kan ring. Lei sang tak tak a awm nual a, chuta tanga han hawi vel hian a mawi em em vek a. He rel kawng hian transportation lama awlsamna bakah khualzin pawh a hip nasain kan ring ni,” tiin an hmalakna te enpui turin Chief Minister chu a sawm bawk.