Rel kawng chhia siam ah theihtawp chhuah turin chah

Food, Civil Supplies & Consumers Affairs Department changtu Minister B. Lalchhanzova chuan Hailakandi District chhung Jamira Station bula Rel kawng chhia siam hna chu theihtawp chhuaha hmanhmawh turin Indian Railways te chu a ngen.

Supply Minister B. Lalchhanzova leh Northeast Frontier Railway (NRF) General Manager Chetan Kumar Shrivastava te chu Zirtawpni khan Guwahati-ah inkawmin Supply Minister hian September ni 27, 2024-a Hailakandi District-a Jamira Station bula railway track tuilianin a tihchhiat chu a hmuna a tlawh thu leh a hmuna thuneitute nen he Rel kawng siamthat a nih theih thuai dan tur an sawiho tawh thu a sawi a, Chetan Kumar Shrivastava chu Hmarchhak Bial-a Indian Railways-a thuneitu sang ber a nih angin he kawng siam hi theihtawpa lo hmanhmawhpui turin a chah a ni.

NFR General Manager hian he Rel kawng hi Mizoram chak lakluhna kawnga a pawimawhzia an hriat thu leh Rel service chhunzawm a nih vat theih nan siamthat hna thawh mek chu an vil reng thu Minister hi a lo hrilh a. Minister-in Jamira Station bula Rel kawng siamthat hna a hmuna a lo han tlawh chu lawmawm a tih thu sawiin, khami hnu khan ruah a sur leh tak fo avanga an tum anga chaka hma an la theilo chu pawi a tih thu a sawi a. Tun October thla chhunga hna zawh hman an tum thu a lo hrilh bawk a ni. Shrivastava hian kumin chhunga Sairang thleng Railhead luhtir an tum chu Kawnpui Station-a leimin a awm avangin nakum kum lai hawl vel an tinzawn a ngaih tak thu Minister hi a lo hrilh bawk a ni.