National Wildlife Week hmang

Rampum-a National Wildlife Week, 2024 hman mek hawnna chu nimin khan Aizawl-a I&PR Conference Hall, Lianchhiari Run-ah neih a ni a, he hun hi EF&CC Minister Lalthansanga chuan a hmanpui a ni.

He hunah hian EF&CC Minister chuan Mizoram-a thil awm reng reng hmangaih tura he huna kalkhawmte chu chahin, “Kan Sakhua Kristianna nen pawh a inzawm tlat avangin kan ramngaw leh nungcha te kan humhalh sauh sauh a pawimawh a. An tel lo chuan kan dam khawchhuak thei dawn lo a ni tih hre tlang ang,” a ti bawk. Forest Minister chuan ramsa pel chingte chuan sim a, an awm ang anga awmtir mai chu ramsa humhalhna tha ber anih thu sawiin, an chenna ramngaw tichereu lo tur leh ei leh bar kan zawnna kawngah pawh nungchate chunga zahngaihna lantir tur a nih thu a sawi bawk. Kumin a National Wildlife Week-ah hian ‘Wildlife Conservation through Co-existence’ (Inngeih taka khawsa tlang chunga nungcha humhalh) tih chu thupui-ah hman niin Wildlife Week hian October ni 8 thlenga hman tur a ni.