Mizoram-a Cyber Crime Seminar neih tur Serchhip-ah Chief Minister in a hawng
MJA General Hqrs. in Mizoram District hrang hranga ‘Seminar on Cyber Crime’ an buatsaih tur hawnna hun Serchhip Press Club-a neih ah hian Chief Minister Lalduhoma chuan Information Technology (IT) lamah hma kan sawna kan tangkaipui em em laiin he hmasawnna hi misualte pawhin an lo hmang tangkai ve zel tih a sawi a. “Internet kaltlanga inbumna a tam em em a, a pung zel emaw tih mai turin a awm. Heng sualna laka kan him theih nan mipuiten a chin kan hriat a ngai a, Vawiin-ah Journalists ten a zirhona in han buatsaih hi lawmawm ka ti a. In zarah mipuite pawhin zau taka an lo hriat kan beisei dawn a ni,” a ti.
Chief Minister chuan Cyber Crime bik buaipuitu tur bik Cyber Crime Police Station hi May ni 20, 2022 khan Mizoram sawrkarin a din tawh thu sawiin, din a nih kum hian case 158 ziahluh nghal a ni tih a sawi a. Nikum 2023 khan case 72 leh kumin kum kal mekah case 33 ziahluh tawh a nih thu sawiin, “Fimkhur tura mipuite zirtir uar a pawimawh ang bawkin misualte dapchhuah leh hrem kawnga thawktu - Dan kengkawhtute pawh kan inbuatsaih sauh sauh a ngai a. Technology danglam chho zelah misualte hi a theih chin chinah kan fin khalh tur a ni,” a ti bawk.
Chief Minister chuan a kaihhruai sawrkar thar lakluh ni-a thuthar thehdarhtute a kawmna ah Fake Account hmanga midang beih chingte chu a tul anga umzui zel tur a nih thu a lo sawi tawh thu sawiin, hetiang Fake Account hmanga dawihzep taka midangte beihna hi a tam chhoh zel a hlauh thu te; Fake Account hmanga inbeihna ang chi hi kan sim loh chuan thenawm khawveng inbeih nan te pawh kan hman theih thu leh kan khawtlang nun tichhe thei a nih thu te sawiin, Cyber Crime leh a kaihhnawih thil te chu palzam mai lo turin mipuite chu a ngen a. “Hnamdang ten ram hla atanga min rawn bum an tum hi chu engemaw chenah a hriatthiam theih viau a. Mahni hnampui leh thenawmte bum tuma lo buai ve ngar ngar kan awm a nih chuan i sim ang u,” tiin mipuite chu a sawm bawk a ni.
Serchhip-a ‘Seminar on Cyber Crime’ hi MJA General Hqrs. President C. Lalrambuat-saiha chuan kaihruaiin Mizoram Police CID Crime-a Addl. SP Zonunsanga chu Resource Person atan hman a ni a. Cyber Crime chu engemaw Device hmanga inbumna chi hrang hrangte a ni ber tih sawiin, Cyber Crime kaihhnawih thubuai zaa 70 atanga 80 chu sum kaihhnawih a inbumna a nih thu sawiin, amaheraw chu heng te hi Bank account nei ten keimahni atanga engemaw kan lo tih ve loh chuan a hlawhtling thei lo tih sawiin, “Chuvang chuan kan lo fimkhur ve a ngai a ni,” a ti a. Heng mi bum thin te hian thil chinchang hre lo zawk kum upa te leh sum leh pai-a duham te chu an bei ber thin tih sawiin, hei bakah hian mi hausa leh sum leh pai nei deuh nia lang te chu bum tuma an beih thin ber thu a sawi.
Hei bakah hian mipuite tana fimkhurna tur hrang hrang pawh sawiin, Social Media atanga kan biak thin te pawh nise sum leh pai hmanga min rawn vaukhan an awm chuan rin loh phawt tur a nih thu te, tunlai ah Online hmanga thil chah hmanga inbumna a hluar thu te a sawi a, UPI (Online Payment) hmanga pawisa thawn sual nia insawi te awmin thawnlet tura tiin, hetiang kan tawng a nih chuan kan thawnlet hmain kan Bank account-ah sum a lut ngei em tih finfiah hmasak thin tur a nih thu leh Loan lem hmanga inbumna te pawh a hluar hle tih a sawi a. Zawhna leh chhanna hun hman a ni bawk.
Comments
Post a Comment