Chief Minister in a tul hun apianga biakpawh theih a nih thu Serchhip-a Head of Offices te a hrilh

Serchhip Bialtu MLA leh Chief Minister Lalduhoma chuan Serchhip District-a Head of Offices te chu a tul hun apiangah an tan biakpawh theih a nih thu a sawi.

Serchhip Bialtu MLA leh Chief Minister Lalduhoma hian nimin chawhnu khan Serchhip DC Conference Hall-ah Serchhip District Head of Offices te inkawmna neihpuiin State Level-ah Deputy Secretary chin an inkohkhawm tawh thu leh Serchhip-ah erawh chuan bialtu MLA a nihna angin an thawhho dan tur sawiho a duh thu a sawi a, “Vawiin-ah kan sawi vek seng lo a nih pawhin a tul hun apiangah in tan biakpawh theih ka ni,” a ti a. Data dik neih an duh thu leh eng Department pawh Data dik tak nei tura tan la turin a a chah a. “Land registration fel fai neih pawh a tul em em bawk. Kan District chhunga Bank ten CD Ratio tha nei ngei se kan duh a. Chu chu mipuiten hmasawn zel nana kan mamawh a ni. CD ratio nei tha tak tak Bank an awm tih kan hriat rualin tan han lak deuh mamawhte pawh kan awm thei a. Kan Bank te lo tang sauh sauh turin ka ngen che u a ni,” a ti.

Serchhip District-ah ni 100 inhlawhna lama hmalakna a that thu leh lawmawm a tih thu pawh Chief Minister chuan sawiin, “Kawng dangah pawh Serchhip hian hmahruaitu nihna kan nei nual. Tunhnaiah 3D Dental Lab hmasa ber kan hawng a, Thenzawl-ah puantahtute tan QR Code tangkai zawk a hman theihna kan hawng bawk. In hnathawh rah duhawm tak tak kan lo hriat hian kan lawm thin a ni,” a ti a. Cooperative Society Movement chu tun aia uar zawka kalpui tha a tih thu leh PACS chu kan la ngah tawk lo hle-a a hriat thu sawiin, “I tang zel ang u,” a ti a. Mission Organic Value Chain Development for North Eastern Region kalpui mekah pawh chak zawk leh tha zawk a hmalak tum turin a chah a ni.

Sawrkar hnathawkte inkarah te, Service leh Service inkarah te inelna dik lo awm lo se tih pawh Chief Minister chuan sawiin, “Mahni hma chauh thlir lovin, kan ram tana tha tur zawk kha kan en tur a ni,” a ti a. “Officer ten kan hnuaia thawkte mamawh leh harsatnate kan ngaihthla tur a ni a, kan ngaihven tur a ni. Kohhran-ah te, tlawmngai pawl-ah te kan inhmang thin, thil tha tak a ni. Nimahsela, kan hna hi i ngaipawimawh ber zel ang u,” tiin Officer te hi a chah a. Handholding Scheme kalpui turah Handholders training an kalpui hmasa dawn tih pawh sawiin, “Nangni hi a taka kalpuitu turte in nih avangin a hlawhtlin ngei theih nan Progress Partner thlan atangin lo fimkhur ang che u. Kan Flagship Scheme hi hna hmasa ah in lo nei zel dawn nia,” tiin a chah bawk.

Bialtu MLA in Serchhip-a sawrkar Department hotute a kawmna hun hi Bawrhsap Paul L. Khuma chuan kaihruaiin Serchhip District Administration dinhmun tlangpui a sawifiah a. Chumi hnuah Officers te hian an hnathawhna kawnga harsatna an neih te leh Chief Minister hnena sawi duh an neih apiangte an sawi bawk a ni.