Mizoram-ah naupiang 12084 leh mitthi 4861 chhinchhiah

Kumin hian Mizoram-ah naupiang 12,084 awm tawhin mitthi 4861 an awm tawh bawk.

Directorate of Economics & Statistics chhinchhiah danin kumin chhung hian Aizawl District-ah nau piang tam berin 5072 an piang tawh a, Hnahthial District-ah tlem berin 57 an piang bawk a. Hengt bakah hian Mamit District-ah nau piang 766 awm tawhin, Kolasib District-ah 851, Champhai District-ah 1059, Serchhip District-ah 285, Lunglei District-ah 1035, Lawngtlai District-ah 1838,Siaha District-ah 716, Saitual District-ah 245, Khawzawl District-ah 160 leh Hnahthial District-ah 57 an awm tawh bawk a ni.

Mizoram chhunga mitthi 4861 chhinchhiah zingah hian Aizawl District tam ber bawkin 2295 an thi taw a, an zingah hian Lung natna kaihhnawih natna hrang hranga thi leh Cancer vanga thi an tam a. Mamit District-ah mitthi 199 chhinchhiah niin Lung thalo leh thawk lama harsatna leh accident vanga thi an tam ber a, Kolasib District-ah mitthi 365 awm tawhin Cancer natna vanga thi an tam ber bawk. Champhai District-ah mi 359 thi tawhin Cancer vanga thi an tam ber a, Serchhip District-ah mitthi 244 awm tawhin Lung thalo, Cancer leh thawk lama harsatna avanga thi an tam a. Lunglei District-ah mi 383 thi tawhin Cancer leh thawk lama harsatna avanga thi an tam ber a, Siaha District-ah mi 163, Saitual District-ah 181, Khawzawl District-ah mi 141 leh Hnathial District-ah mi 88 an thi tawh bawk a ni.

Chhinchhiah chinah kumin 2024 chhungin Mizoram-ah Cancer vanga thi mi 446 awmin mi ten an thihpui natna langsar ber te zinga mi a ni a, Lung natna avanga thi mi 344 an awm tawh bawk a, BP sang avanga thi mi 42, Malaria avangin mi 22, Hepatitis avangin mi 22, thawk lama harsatna hrang hrang avangin mi 378 leh Accident avangin mi 167 an thi tawh bawk a a. Heng bakah hian mahni nunna la mi 43 zet awm tawh bawkin natna dang avanga thi 3369 an awm tawh bawk a ni.