Governor atan Indra Sena Reddy Nallu lalut ta

Tripura Governor nilai Indra Sena Reddy Nallu chu nimin September 30, 2024 khan rinawmna thu tiam tirin Mizoram Governor Dr Hari Babu Kambhampati chawlh lak chhunga Mizoram Governor hna thawk turin lakluh a ni.
Governor lakluhna Inkhawm hi nimin khan Raj Bhavan Durbar Hall-ah neih niin Chief Secretary Dr. Renu Sharma chuan President in Governor hna lo chelh tura a ruatna thupek chhiar hmasain Governor lakluh inkhawm hi tan a ni a. Gauhati High Court Judge, Justice Nelson Sailo chuan Indra Sena Reddy Nallu hi rinawmna thu tiamtirin Mizoram Governor hna thawk turin a lalut a ni.

Mizoram Governor thar Indra Sena Reddy Nallu hi March 31, 1949 khan Nalgonda District, Telangana-a thingtlang khaw pakhat Ganuga Banda-ah a piang a, a hi N. Ram Reddy niin a nu hi Hanumayamma a ni a, a nupui Renuka Nallu nen fapa pathum an nei tawh a ni. Indra Sena Reddy Nallu hi kum 1983, 1985 leh 1999 khan Undivided Andhra Pradesh-ah term thum chhung MLA a ni tawh a, kum 2003 khan BJP State President hna chelhin kum 2014 khan BJP National General Secretary atan ruat a ni bawk.

Mizoram Governor hna chelh lailawk tura ruat a nih hnuah niminpiah khan Lengpui Airport atangin Aizawl a rawn thleng a, Chief Minister Lalduhoma chuan lo dawngsawngin sawrkar mi pawimawh dang ten an tawiawm bawk a. Nimin-a lakluhna hun hman ah hian Chief Minister Lalduhoma, Speaker Lalbiakzama, Home Minister K.Sapdanga, Cabinet Minister dangte, Minister of State te, Lok Sabha MP, DGP leh sawmbik te an tel a ni.