Serchhip-ah Police an Duty laia hmelma te kut tuara boral te hriatrengna leh zahna lantir a ni
Serchhip SP Office Tual-a 'Police Commemoration Day' puala hun hman ah hian Serchhip Addl. SP Saidingliana Sailo chuan, “He ni a lo thlen hian nikum (2023) September atanga kumin (2024) August thla inkara India ram hmun hrang hranga ram tana nun pe kan thawhpui mi 214 kan hrereng a, an sulhnu zuiin Ram leh hnam tana inpekna thuk zawk nen thahnemngai taka kan hna thawk turin inpe thar leh ang u,” a ti a. Police te chu kil tin atanga mite thlir rawn leh an tihthat tam tak aia an tihsual palh pakhat lek pawh langsar zawk a nih avangin mahni inthununna tha tak nen, dik leh rinawm taka an hna thawk tura insangmar zel turin a chah a, “Mite tanpuitu, ram leh hnam tana mahni inhlan chunga thawk tur kan nih hrerengin, dikna, huaisenna leh rinawmna nen kan Uniform zahawmna i vawng tlat ang u,” a ti.
Serchhip Addl. SP chuan, “Mizoram chu kan ram a ralmuan avang te pawh a ni ang a, tun kum khat kalta chhung khan duty laia nunna chan kan awm lo,” a ti a, “Amaherawhchu Head Constable Lalfamkima, BSF leh Rifleman Sandama Darlong, Tripura Police ami te erawh vanduaithlak takin an martar a ni. Vawiin Martar Ni-ah hian kan rilru leh ngaihtuahna te ram leh hnam tan inhlan thar leh ila, khawtlang leh ram tan kan theihtawp i chhuah leh ang u,” tiin hemi hnu hian an Duty laia ram tana nunna hlantute zahna atan leh hriatrengna atan ngawi rengin minute khat (1) an ding a ni.
British hunlai atang tawhin India Police te hian Tibet leh India inrinna lai bawr mel 2500 zet an veng thin a, October ni 21, 1959 khan mahni ram venghim tura hnathawk (duty) mek India Police, Karam Singh, DCIO leh a hote Police mi 20 rual chu Aksai Chin pela ralthuam famkim nena rawn lut ru China sipai rualte chuan Hot Springs (Ladakh)-ah lambun in Automatic Rifle leh Grenade hmangin an lo bei a. A hmunah mi 10 thiin mi 7 chu hliam na tak tuarin China sipaite chuan an man a. Heng ram tana nunna chan te ruang hi China sipai chuan 13th Nov. 1959-ah India kutah hlanin Ladakh-a Hot Spring-ah chawimawina famkim nen halral an ni ta a ni. Hemi hnu kum 1960 atang chuan 21st October chu 'Police Commemoration Day' atana ruat niin kumtin Police ram tana nunna hlante hriatrengna, sunna leh chawimawina hun atan an hmang ta thin a ni.
Comments
Post a Comment