Feb. ah VC thlan tum a ni

Home Minister K. Sapdanga chuan kumthar February thla a Village Council inthlang hman turin inbuatsaihna kalpui mek a nih thu a sawi.

Inrinni-a Kawnpui Police Station leh Mualvum-a First IR Battalion hmunpui, Kawnpui leh Hortoki khuate a tlawhna-ah K. Sapdanga chuan, an party in sawrkarna chang mahse Village Council tam zawkah party dang VC an la tam zawk avangin hmasawnna hnathawh a harsa tih a sawi a. Hei vang hian sawrkar chuan hmasawnna thawh a nih thuai theih nan a rang thei ang bera VC inthlan buatsaih a tum a, February thla-a inthlanna hi nei hman turin inbuatsaihna kalpui mek a ni, a ti.

Home Minister chuan, Police lak thar turah online hmanga dilna thehluh theih turin buaipui mek a nih thu pawh sawiin, Police indaihlohna phuhru turin sawrkar-ah Police hnaruak 1,100 hnawhkhah dilna thehluh a ni a, sawrkar sum dinhmun a that loh avangin police 290 lak phalsak a ni a; karleh maiah Police lakna tur Advertisement hi tihchhuah tum niin, Online hmang pawha dilna thehluh theih turin buaipui mek a ni, a ti a. “Mipuiin Police te lakah beiseina an nei sang a, rim taka hnathawh a ngaih bakah mipui nena thawhhona tha neih a pawimawh a ni,” a ti bawk.