CM-in Serchhip-ah 3D Dental Laboratory a hawng
‘Sawrkar tha zawk in duh avanga nghet taka in din tlat vang a ni’ - CM
Chief Minister Lalduhoma chuan nimin khan Govt. Serchhip College ah PM DevINE sum atanga siam ‘3D Dental Laboratory’ thar a hawng a. Tunhnaia Serchhip Bial-a hmasawnna thil an hawn te chu Serchhip Bial mipui ten sawrkar tha zawk an duh avanga nghet taka an din tlat vang a ni tih a hriat thu sawiin, lawmthu a sawi bawk.
Chief Minister leh Serchhip Bialtu MLA Lalduhoma hian Govt. Serchhip College-ah ‘3D Dental Laboratory’ hi hawngin he Laboratory hi Serchhip District Hospital-a dah tur a ni a. District Hospital hi sak thar mek a nih avangin 5G Internet Service awmna Serchhip College-ah hian bun rih niin hemi rual hian District Hospital-ah Mobile ECG Device leh Drip Monitoring System te pawh hawn an ni a. Laboratory hawnna inkhawm hi Serchhip DC Conference Hall-ah neih chhunzawm a ni.
3D Dental Laboratory hawnna hunah hian Chief Minister chuan he hmalakna a hlawhtlin theih nana thawktute chungah lawmthu sawiin, “Ha siam tur nei te tan awlsamna nasa tak a pe dawn a, mi tam takin an chhawr tangkai ka beisei,” a ti a. He Laboratory hi North East State tinah dah thar vek a nih thu leh AMTRON ten Guwahati atangin an thlungkhawm tih sawiin, Training pawh anni hian an rawn buatsaih thuai tur thu a sawi a. He hmasawnna thar hi Industrial Revolution 4.0 an tih huanga mi, 5G Connectivity Service leh 3D Printing Technology huanga mi a ni tih a sawi a. “A changkang em em a, a che rang bawk a. Ka bial-ah ngei kan han hawng hmasa thei hi ka lawm hle. 5G High Speed Internet hmanga Telemedicines hmalakna dangte pawh kan ngaihtuah chho zel dawn a ni,” a ti bawk.
Serchhip Bialtu MLA chuan Serchhip District Hospital sak mek a nih thu pawh he hunah hian sawiin, CSR atanga cheng vbc. 21 kan hmuh hmanga sak tur a nih thu leh chumi mil chuan DPR pawh buatsaih a nih thu leh cheng vbc. 18-a sain vbc. 3 chu bungrua leina atan ruahman a ni tih a sawi a. Hemi ringawt hi chuan Hospital tha kan nei dawn lo tih sawiin, kawng dapin vbc. 80 vel pek belh an tum laiin tunhnai maiah Central lamin Hospital pakhat sakna atan vbc. 50 aia tam an phal tak loh thu a sawi a. Hei vang hian Serchhhip District Hospital sakna atan hian vbc. 50 an dah tak chu leh a lo awmsa vbc. 21 nen cheng vbc. 71 in sa tha thei tawk turah an in ngaih thu a sawi a. A sak hna a that tawk leh that tawk loh viltu tur dah an nih dawn thu pawh Chief Minister Minister hian a sawi bawk a. Chutihrual chuan heng hna thawh hrang hrangah te hian Mipuite chu a endiktu an nih a ngaih thu leh kan bengvar tlan tha a tih thu pawh a sawi bawk a ni.
Serchhip Bialtu MLA Lalduhoma hian Tourism lama Serchhip Bial-a hmalakna turte leh tunhnaia an thil hawn thar te sawiin, “Chief Minister dinhmun a ding chunga heng thil ka hawng thei hi Serchhip District mipui ten sawrkar tha zawk in duh avanga nghet taka in din tlat vang a ni tih ka hriatin in zavaia chungah lawmthu ka sawi a ni,” a ti bawk.
Nimin-a 3D Dental Laboratory hawnna hun hi Serchhip Addl. DC Lalrinzuala chuan kaihruaiin Serchhip District Bawrhsap Paul L. Khuma chuan inlawmna thu a sawi a, AMTRON-a Adviser Ashish Anand chuan Technical Report pek pahin 3D leh 5G Technology hmanga hmalak theihna la awm te a tarlang a. Dr. Lorho S Pfoze, ex Vice Chairman, NE MPs Forum leh Sherry Lalthangzo, Economic Adviser, NEC te pawhin thu an sawi bawk a ni.
Nimin-a he hun hman ah hian tunhnai a NEC Digital Tourism Project hnuaia IHM Delhi-a ni 45 chhung awh Hospitality Sector training a kal te leh Training chhuak Serchhip thalai mi 15 te hnenah Chief Minister hian Certificate a hlan nghal bawk.