Chief Minister in zirlaite ruihhlo laka fihlim tur leh nun kawng pangngai tak zawh tlat turin a chah
Serchhip District Secondary School Sports Meet 2024 hawnna huna tel zirlaite chu Bialtu MLA leh Chief Minister Lalduhoma chuan nakin lawka Mizoram la enkawltu turte an ni tih in hrereng tura chahin, Serchhip District chuan tunhnaiah infiamna lamah hma a sawn nasa tih a sawi a, Badminton, Football, Boxing, Taekwondo leh discipline thenkhatah India rama lang phak kan nei nual chu a lawmawm hle tih a sawi a. “Sawrkar hnaah kan vaia luhna tur a awm loh avangin kawng danga talent tha tak takte chuan lo tipung ula, lo bei zel rawh u. Talent haichhuah kawngah pawh tan ila zel ang u,” a ti. Kan thalaite chu sawrkar chuan a thlahthlam ngai dawn lo tih pawh Chief Minister chuan sawiin, “Infiamna hmunhmate pawh a theih ang angin kan thuam tha chho zel dawn. Serchhip Sports Complex pawh hi mi inphalten infiamna hmun atana an pek a ni a, an pek ang takin infiamna ruhrel tha tak tak sak nan kan hmang zel ang,” a ti bawk.
Tunlaiah sualna a pun nasat thu leh Serchhip khawpui ngei pawhin kan tuar hle tih kan hriat thu Chief Minister chuan sawiin, “Nangni zirlai naupang duhawm tak tak te hi chuan pangngai takin in nun rawn hmang ang che u. Mi chungchuang nih a har a ni thei, mi pangngai nih erawh chu thil harsa a ni lo. Nun kawng pangngai tak zawh ula, in taksa, in rilru leh in thlarau tan thlengin chu chu malsawmna a ni dawn a ni,” a ti bawk.
Nimin-a Serchhip District Secondary School Sports Meet 2024 hawnna hun hi Serchhip District Secondary School Sports Committee Chairman David Laldintluanga chuan kaihruaiin Secretary Richard Lallawmkima chuan Report a pe a, he Sports Meet-ah hian Serchhip District chhunga High School 30 chuang awm atangin School 19-a zirlaite an tel dawn a, mipa tan infiamna chi 19 leh hmeichhe tan infiamna chi 17-ah inelna neih tura ruahman niin zirlai 600 vel tel tura beisei an ni a. Kumdang-a la telh ngai loh, Zirlai mipa te tan ‘Kalchhet kal’ leh hmeichhia te tan ‘Inkawibah’ ah te inelna neih a ni dawn a, Serchhip-a infiamna hmun hrang hrangah inelna neih tura ruahman niin tunkar Zirtawpni khian zawhfel tur a ni ang.