WorldSkills Lyon 2024-ah Mizo 2 tel dawn

Mizo thalai pahnih Emily VL. Thakimi, Aizawl Khatla Veng leh Maximus Lalruatkima, Dawrpui Veng te chu khawvel pum huap thiam thila inelna, ‘WorldSkills Lyon 2024’-ah an tel dawn.

WorldSkills 2024 hi naktuk, Sept. 10, 2024 atang hian Euroexpo Lyon, France-ah neih tan tur niin tun thla ni 15 thleng neih a ni dawn a, khawvel ram hrang hrang 70 chuang atangin thiamthil hrang hranga intihsiaknaa tel tur mi 1400 chuang leh Expert mi 1300 chuang bakah chhimtu mi engemaw zat an pungkhawm dawn a, heng Mizo thalai pahnih te hi India ram aiawh 60 zingah telin Inrinni khan France an thleng a ni.

Emily VL. Thakimi leh Maximus Lalruatkima te hian kumin May ni 15 atanga ni 19 thlenga Delhi-a neih, IndiaSkills 2024 intihsiaknaa tel mi 900 zingah Gold Medal an lo la ve ve tawh a. Emily VL. Thakimi hian Fashion Technology-ah Gold Medal Medal lain Maximus Lalruatkima hian Floristry-ah Gold Medal a la ve bawk a ni. Emily VL. Thakimi hi Women’s Polytechnic, Aizawl atanga Garment Technology zirchhuak a ni a, Maximus Lalruatkima hi PUC-a Public Administration III Semester zirlai a ni.