Mizoram-a Helicopter Service tihpun tum

Ministry of Home Affairs (MHA) hotute chuan Mizoram-a Helicopter service mek pakhat bakah a dang pakhat pek belh an tum tih Adviser to CM (Technical) H. Ginzalala an hrilh.

Champhai North bialtu MLA leh Adviser to Chief Minister (Technical) H. Ginzalala hian kar hmasa khan Delhi-ah sawrkar laipui dawrin Mizoram mamawh hrang hrangte a thlen a. Chief Minister Lalduhoma’n Mizorama Helicopter service changtlung leh tam zawk a awm theih nana hma a lo lak tawhna te bawhzuiin MHA leh Civil Aviation hotute a kâwm a; MHA hotute’n Helicopter service dang pakhat pek belh an tum thu leh Mizoram sawrkarin lehkha tihfel ngai la awmte a tihfel hunah Tender theih a nih dawn thu an lo hrilh a ni.

H. Ginzalala hian Ministry of Road Transport & Highways Minister, Nitin Gadkari pawh hmuin, Champhai Khankawn atanga Kanan Veng inkar kawngpui chungchang leh Mizorama NHIDCL hmalakna hrang hrangte a sawipui a. Department of Agricultural Research & Education Secretary, Dr. Himanshu Pathak, Indian Council of Agriculture Research (ICAR) Director General chu Lunglei, Champhai leh Saitual District-a Krishi Vigyan Kendra (KVK) din chungchang a sawipui bakah Ports, Shipping and Waterways Minister Sarbananda Sonowal leh Inland Waterways Authority of India (IWAI) Chairman, Vijay Kumar te pawh a kâwm a, Mizorama lui hmanga inkalpawhna tura ruahmanna te a sawipui a ni.