Vawk thi 12 awm belh leh

Nimin khan Serchhip District-ah ASF vanga Vawk thi 12 chhinchhiah leh niin Vawk 36 suat leh a ni bawk.

AH&Vety Department ten an chhinchhiah danin nimin khan Serchhip District-a khaw 5-ah ASF vanga Vawk thi 12 chhinchhiah leh a ni a, heng te hi Chhiahtlang leh Khawlailung-ah 3 ve ve leh Baktawng, Thenzawl leh East Lungdar-ah pahnih theuh te an ni. Nimin vek khan Serchhip District-ah ASF hri darh zel tur venna atana Vawk suat 36 chhinchhiah leh a ni a, heng zinga 15 te hi East Lungdar khuaa mi niin Serchhip Dinthar-ah 7, Khawlailung-ah 6, Chhuanthar Tlangnuam-ah 4, Baktawng-ah 2 leh Chhiahtlang leh New Serchhip South-ah pakhat ve ve te an ni.

Heti hian nimin thleng khan Serchhip District-a ASF vanga kumin chhunga Vawk thi chu 3079 a tling tawh a, Vawk 6231 suat ni tawhin ASF hri leng hi chhungkaw 1915 zetin an tuar tawh a ni.

Serchhip District-ah hian Veng leh khua 21 te chu ASF hri lenna hmun ah puan a ni tawh a, heng khua ah te hian vawk sa zawrh te khap a ni a, amaherawh chu hri lenna a puan khaw thenkhat ah chuan hun rei tak Vawk thi a awm tawh loh avangin khawtlang hruaituten ruahmanna an siam angin Vawk talh dan ruahmanna te siam a ni bawk.