Tuialhthei khuahkhirh a ni

Mizoram-a tuialhthei lakluh kawngah harsatna a awm thei nia a lan avangin Serchhip District-a tuialhthei hralhchhuah dan ruahmanna siam a ni.

Hemi chungchanga nimin-a Serchhip District Bawrhsap Paul L. Khuma’n thuchhuah a siam danin Mizoram Oil Tanker Driver Association (MOTDA) leh Petroleum Entrepreneurs' and Transporters' Union of Mizoram (PETUM) te'n tunhnai ruahsur avanga tuialhthei phur (oil tanker) khalhtu te an him zawk nana tlan chhunzawm an tum rih loh avangin POL Supply khaihlak thei dinhmunah kan ding tih a tarlang a. Petrol leh Diesel mamawhtuten rualkhai zawka an chan theihna turin Filling Station-ten an pek chhuah theih zat bitukin hemi ang hian Scooter/Scooty-ah litre 2; Two Wheeler dang-ah litre 4; LMV-ah Litre 10; Sumo/Pik-up/407/Gypsy/Medium Truck-ah litre 20; Truck-ah litre 40 leh buhfai leh Essential Commodities phur Truck-ah an Challan enin an kalna tur kal leh haw lam daih pek tur a nih thu a tarlang a ni.

He thupek hi thu leh a awm hma chuan Legal Metrology Inspector ten ni khat-ah darkar 24 chhung Duty in an enfiah thin dawn a, Motor Spirit (Petrol) hi Dead Stock tel lovin litre 3000 leh High Speed Diesel (HSD) hi Dead Stock tel lovin litre 5000 a awmin, DCSO, Serchhip hnenah Pump neitu ten an report tur a ni a, DCSO Serchhip-in Deputy Commissioner, Serchhip District leh SDO (Civil) North Vanlaiphai/Thenzawi hnenah thu hlanchhawngin Dead stock baka Control tur chinah chuan Dealer/Filling Station ten mipui ah hralhchhuak (free sale) tawh lovin Serchhip DC atanga phalna nei chauh te hnenah hralhchhuah tur a ni anga. SDO(C) Thenzawl leh North Vanlaiphai awmna (Headquarter) Filling Station atanga Petrol leh HSD lak tum te hnenah (control tur chinah), SDO (C) te phalna neite hnenah chauh hralhchhuah tur a ni bawk ang.

Thudawn danin Serchhip-a Petrol Pump-ah chuan nimin atang khan tuialhthei pekchhuah dan hi khauh taka khuahkhirh nghal a ni.