Serchhip-ah ‘Poshan Walk’ neih niin Mizo tualchhuak infiamna inzirtirna hun hman a ni
Poshan Walk neih a nih hnu hian Rashtriya Poshan Maah 2024 hnuaiah Serchhip ICDS Project bultumin Leisekawt Mual-ah Early Childhood Care and Education (ECCE) Festival neih chhunzawm nghal a ni a, he hun hi Serchhip ICDS Project Office atangin Calvin Lalngaihsanga chuan kaihruaiin Serchhip CDPO Caryll Lalpari chuan naupang te tana infiamna pawimawh zia leh an than chhoh zelna atan te, thenrual kawm an zirna atan te, tawng an zirna atan te leh an thluak tan te bakah rilru hrisel taka an than chhhohna atan infiamna a pawimawh dan te a sawi a. Tunlaia naupang inawm lemna (Toys) chi hrang hrang te chu man to tak tak leh changkang tak tak, nu leh pa te tan phurrit a nih theih thu sawiin, he Festival in a tum chu Mizo tualchhuak infiamna leh hmanlai Mizo infiamna leh inawmtleina chi hrang hrang te inzirtir thar leh a nih thu a sawi a, naupangin nuam ti taka an infiampui theihna tura an zirtir thar leh a pawimawh thu te a sawi bawk a. Naupang te hi an hrisel loh chuan nu leh pa mai bakah chhungkua a nuam lo thin tih sawiin, Tunlai naupangin kamram leh hmawmsawm atana an ei nasat zinga tam tak chu ram pawn atanga lakluh, hriselna atana tha lo leh hang tak tak te an nih hlawm avangin ei tam tir loh a that thu a sawi bawk.
He hunah hian naupang 170 vel telin Serchhip Field Veng Branch YMA Chhang te kaihhruaina hnuaiah Mizo naupang infiamna chi hrang hrang entirin a taka tih nghal zel a ni a, infiamna chi 18 vel hmangin he huna tel te hian intihhlimna hun an hmang a. Serchhip Field Veng Branch YMA President C. Zoramsiama pawhin thu a sawi bakah he ni puala thutiam (Pledge) buatsaih chu ICDS-a thawk Lalnunthara kaihhruaina hnuaiah kalkhawm ten an chhamrual bawk a ni.
Rastriya Poshan Maah hi kumtin September thla chhunga hman thin a ni a, Calendar siamin tihtur hrang hrang ruahman a ni a, hemi ang hian Serchhip ICDS Project hian kawng hrang hrangin hma an la mek a ni.
Comments
Post a Comment