ASF tuartu chhungkaw 2000 aiin an tam tawh

Serchhip District-ah nimin khan ASF vanga Vawk thi chhinchhiah pung leh hretin Vawk thi leh suat 21 ve ve a awm a, Serchhip District-a ASF vanga harsatna tawk hi chhungkaw sang hnih aiin an tam tawh a ni.
AH&Vety Department ten an chhinchhiahna atanga a lan danin nimin khan Serchhip District-a khaw pali-ah African Swine Fever (ASF) vanga Vawk thi 21 chhinchhiah belh leh a ni a, Baktawng khua ah Vawk thi 8 awmin New Serchhip South-ah 6, Chhiahtlang-ah 5 leh New Serchhip North-ah 2 te an ni. Nimin vek khan Serchhip District-ah hri leng avanga Vawk suat 21 chhinchhiah a ni bawk a, Sialsir khua ah 7, Chhiahtlang leh New Serchhip South-ah 6 leh Baktawng leh New Serchhip North-ah pakhat ve ve te an ni.

Heti hian nimin thleng khan Serchhip District-ah hian kumin chhunga ASF vanga Vawk thi 3246 a awm tawh a, Vawk 6514 suat ni tawh bawkin khaw 31-a chhungkaw 2003 te chuan he hri hi an tuar tawh a ni.