Ramsa leh Sava vulh leh khawi 30 chhinchhiah

Zonuna Kawlni (LENKAWL) • September 2, 2024 • Comments • Mizoram

Aizawl Wildlife Division-in a chhinchhiah danin August thla chhung khan Aizawl District-ah rampawn atanga lakluh ramsa leh Sava vulh leh khawi 30 chhinchhiah a ni.

Aizawl Wildlife Division chuan Ramsa leh Sava chhinchhiah tawhte hi dan phal loh an nih vek lo tih sawiin, ramsa leh sava thenkhat chu Dan in khawi leh vulh a phal, chhinchhiahna siam a ngaih avanga Register te a nih thu an sawi a. Chhinchhiah tawh zingah hian Zawng hmaisen (Stumptailed Macaque), Zo Zawng (Rhesus Macaque), Assamese Macaque, Vaiva (Hill Myna), Iguana te chu danin lakluh a phal loh, mimalin an enkawl leh vulh phal lohte an ni a, ramsa leh Sava mimalin a vulh leh khawi an phal loh zingah Savawm, Zawng hmaisen, Sanghar leh Vaiva te chu vulh nasat zual a nih thu an sawi bawk.

Aizawl Wildlife Division Deputy Conservator of Forest (DCF) Margaret Lalramchhuani chuan June thla khan thuchhuah siamin phalna nei lova ramsa leh nungcha vulh emaw, khawi emaw chu dan bawhchhiatna a nih thu leh tilui an awm chuan dan anga hrem an nih tur thu a lo sawi tawh a ni.