LENKAWL ADS (Computer zir duh tan 6) :

Mizoram PWD hotute leh Central YMA hruaitute chu Zirtawpni khan inkawmin thawhhona thuthlung an ziah tawh chungchang an sawiho.

Aizawl-a PWD Engineer-in-Chief Conference Hall-a inkawmhona ah hian hian Mizoram chhunga inkalpawhna kawng dinhmun bakah Aizawl khawpui chhung kawngpui chhe lutuk te sawi a ni a. Mizoram hmun hrang hranga PWD enkawl kawngpui laih mek chungchang te pawh sawiho niin chung zingah chuan Champhai leh Zokhawthar inkar kawng laih mek te, Mamit leh Bairabi inkar, Saikhawthlir atanga Zamuang inkar te leh Aizawl khawpui chhung kawng chhe lutuk chungchangte sawilan a ni a. Central YMA hruaitute chuan kawng laitu hnathawk chak lo ten chak zawka hna an thawh theihna tura puih an ngaihna ah PWD chu puih an inhuam thu an sawi a. Nakuma YMA Inkhawmpui Lian thlenna tur Sakawrdai panna kawng siam that chungchang te leh Mizoram hmun hrang hranga PMGSY kawng laih mek chungchang te sawiho a ni bawk.

PWD hotute chuan Aizawl khawpui chhung kawng chhia leh khuar nasa lutuk chu ruahtui a tlak reng avanga thawh theih a nih loh thu leh khaw that veleha thawk thei tura an inpeih thu an sawi a. Central YMA hruaitute chuan kawng sira tuiluankawr khuh phui a nih avanga kawngpuia tuihawk luang nasain kawng a tihchhiat theih thu an sawi a. A khuhna hi hawna tuihawk luanluh theiha siam an duh thu an sawi bawk.

Central YMA leh Mizoram PWD hian kum 2018 June thla khan Mizoram in kawngpui tha a neih theihna tura thawhhona thuthlung, MoU an ziak a, hei hi ziah belh zelin tuna MoU hi nakum July-ah a tawp ang.