P&E Minister in sawrkar laipui-a Minister te a kawm

New Delhi-a cham mek Power Minister F. Rodingliana chuan Union Power Minister, Manoharlal Khattar leh New & Renewable Minister Pralhad Venkatesh Joshi te bakah Food Processing Industries Minister, Chirag Kumar Paswan te hmuin Mizoram mamawh hrang hrang a sawipui.

Union Power Minister Manohar Lal Khatta nen an inkawmna ah Minister F. Rodingliana chuan kawlphetha pekchhuahna hrui leh Power Sub-Station tihchangtlungna tur Central Ministry-in a pawmpui tawh, bawhzui loha a awm avanga pawisa la pekchhuah loh chungchang thlenin, Union Power Minister hian heng sumte hi an pekchhuah tur thu a lo hrilh a. Ministry of Power-in Hydel Project lian tham siamna tur Scheme thar a duan chu chhawr tangkai turin Central PSU te nen thawkho a Project thehlut vat turin Union Power Minister hian a lo hrilh bawk.

New & Renewable Minister Pralhad Venkatesh Joshi nen an inkawmnaah F. Rodingliana hian kawlphetha hmanga intodelh chu Mizoram sawrkar policy lian ber a nih avangin Hydel Project siam tur Mizoram sawrkarin a buaipui mekte MNRE hnuaia Scheme hmanga tihpuitlin sak turin Union Minister hi a ngen a, Pralhad Joshi chuan heng Small Hydel Project te tihlawhtling tur hian MNRE-in a puih tur thu a lo hrilh a ni.

Commerce & Industries changtu Minister ni bawk F. Rodingliana hi Food Processing Minister, Chirag Kumar Paswan-a chenna In ah lengin, Mizoram Food Processing Industry te tiliana tichangtlung tura hma lakpui turin a ngen a. A bikin Mizorama thlai tha em em leh hnianghnar tak - Sawhthing, Aieng leh Hmarcha sawngbawlna kawngah Food Processing Industries Ministry puihna a ngen a. Union Minister hian project engemawzat siama thehlut tura chahin, a lo bawhzui tur thu a lo hrilh a ni.