NIA Special Court-ah Chargesheet thehlut

National Investigation Agency (NIA) chuan Ningani khan Myanmar lama ralthuam tawlhru thin ni a puh mi 10 lakah Aizawl-a NIA Special Court-ah Chargesheet an thehlut.

NIA thuchhuahin a tarlan danin ralthuam leh puak thei thil dang man chungchanga an chargesheet te hi Lalrintluanga, Laldinpuia, Zoremsanga, Lalbiaktluanga, Lalrinsanga, Zothanmawia, Henry Siangnuna, J. Rohlupuia, Laldinsanga leh David Lalramsanga te an ni a. Indian Penal Code, Arms Act leh Explosive Substance Act Section hrang hrang tlawhchhana thubuai siamsak an nih angin Chargesheet hi Court-a thehluh a ni. Hemi chungchangah hian kum 2022 May thla khan thubuai ziahluh a ni a, hei hi Kelsih khaw dai-a lirthei pahnih atanga puakthei thil, silai leh a mu thahnem tham tak man a nih avanga ziahluh a ni a, lirthei a chuang mi 4-te chu man an ni. NIA-te'n an chhui chhuah dan chuan Myanmar mi an ram chhung leh Mizorama an thawhpuite nen sipai sawrkar dotu pawlte tanpuina atan ralthuam an lei khawm thin niin an sawi a. Aizawl-a awm mek Myanmar mi Lalrinsanga leh mi engemawzat, Myanmar mi leh Mizoram mite chu inhnamhnawih ah puh an ni.