FEMSE in Zirtirtute Ni-ah Bagde dum bel tum

Federation of Mizoram Samagra Siksha Employee (FEMSE) chuan thla thum hlawh an lak tawh loh avangin tunkar Ningani-a Teachers Day-ah Badge dum bel an tum tih an sawi a, FEMSE Sub-Hqrs. Serchhip District pawhin hei hi an zawm ang.

FEMSE hruaitute sawi danin tunah hian thla thum (June - August, 2024) hlawh an la tawh lo a, sawrkar laipuiin March thla tawpa thla thum hlawh cheng nuai 733.10 a rawn sanction chu Treasury-in a hreng khaw tlai a, hetia hren khaw tlai a nih avang hian Central atanga sum lokal tur chu nasa taka tihkhawtlai a nih thu an sawi a. FEMSE Council chuan an dinhmun ngun taka a ngaihtuah hnuah September 5, 2024-a Teachers’ Day 2024 lo thleng tur chu hreh tak chungin Badge Dum bel chunga hman nise tiin a rel ta tih sawiin, sawrkar hotute chu an dinhmun hriatsak a, an harsatna te a rang thei ang bera ngaihtuahsak turin an ngen bawk.

FEMSE Sub-Hqrs. Serchhip District te pawhin FEMSE General Hqrs. thuchhuak hi lungrual taka zawm ve an tum thu LENKAWL hrilhin, an Member te chuan Badge dum hi an bel ve dawn thu an sawi a ni.