Mizoram-a Tuialhthei atanga Chhiah lak pung Taxation Minister in a sawifiah

Taxation Minister Dr. Vanlalthlana chuan Petrol leh Diesel man tlahniam zelin Chhiah a tihtlem zel avang leh mipuite tana hna thawk tura sum kan mamawhna a san chhoh zel tak avangin chhiah tisang lo thei lo dinhmun ah an ding tih sawiin, mipuite bakah lirthei-a eizawngte pawh an hmalakna hi lo hrethiama harsatna siam lo turin a ngen.

Petrol leh Diesel-a Chhiah tihpun chungchangah nimin khan Taxation Minister Dr. Vanlalthlana chuan a Pisa-ah thuthar thehdarhtute kawmin Petrol leh Diesel atanga VAT tihpun chu thil harsa tak leh ngaihtuahna thui tak hman ngai a nih thu leh nghawng a neih tur leh mipui ten harsatna an tawh theih tur thil tam tak ngaihtuah lawk a niin hun rei tawh tak atang khan buaipui a lo ni tawh tih a sawi a. Kumin kumtir lam, February 17, 2024 khan Mizoram Resource Mobilisation Committee atangin Petrol leh Diesel man tisang tur leh November, 2021-a tihhniam a nih hmaa VAT rate (Petrol-ah 25% leh Diesel-ah 14.55%) hmanga chhiah la leh tura ngenna khauh tak an dawn thu sawiin, “He thil hi ngun taka ngaihtuah a nih hnuah an ngenna hi a zahawm kan tih bakah kan ruala Petrol leh Diesel man titlemtu, State dangte pawhin an tih to chho leh tawh hlawm tih kan hriat avangin rate thar hmang turin ngaihtuahna kan seng chho ta,” a ti a. Petrol leh Diesel a chhiah tihsan tawp ai chuan mipui ten an hriatthiam zawk theih nan tiin ‘Road Infrastructure Cess leh Social Infrastructure Service Cess’ hmanga tihsan chhoh ni se an tih thu a sawi a ni.

Taxation Minister chuan Mizoram tan chuan Petrol leh Diesel atanga Cess lak hi thil thar ni mah se State dangte chuan hming chi hrang hrang hmangin an lo la reng tawh tih sawiin, Mizoram-ah hi chuan a vawi khatna niin Mizoram VAT Rules pawh tihdanglam a nih thu a sawi a. “Road Infrastructure Cess hi Road Fund Act, 2007 nena kal kawpa lak a niin kawng siamthatna atana hman tur a ni a. He thil hian kawng siamna atan sum kan tlakchhamna chu eng maw chen chu a tihziaawm dawn bakah kawng siam a hnathawktute, Officer te leh Minister chenin mawhphurhna (accountability) sang tak a bel dawn a. Kawng siam a nihin litre khata Rs..2 kan pek kan hrechhuak ang a. Tun aia ngun lehzual a kawng siam kan vil bakah kawng tichhe zawnga mimal, sumdawnna leh pawl thil dah thinte pawh an inkiltawih sawt kan beisei a ni,” a ti.

Social Infrastructure Services Cess chu zirna in tihchangtlunna atan te, hriselna kaihhnawiha hman atan te, Skill Development leh Hmeichhia te chawikanna (Women Empowerment) atana hman tur a ni tih pawh Minister chuan sawiin, “He thil hian khawtlanga kan harsatna tam tak pawh a tihziaawm ngei kan beisei tlat a ni,” a ti a. “Mizoram-a chengte hian chhiah kan pek tam loh avangin VAT rate tihsan tawp ai chuan a hmanna tur awmsaa chhiah tihpunna siam hi a felfai zawkin mipuite pawh min lo hriatthiam hram turin ka ngen tak meuh a. Petrol leh Diesel man hi sang viau angin lang mah se kum 2 kaltaa Petrol leh Diesel man aiin a la hniam zawk a ni tih min lo hriat sak turin ka ngen leh che u a ni,” a ti.

Nov. 4, 2021-a Petrol leh Diesel chhiah Rs.7 a tihhniam chu a chet hnuhnung ber a ni tih Minister chuan sawi bawkin, hemi kum hian Petrol leh Diesel atanga chhiah lak zat kha 25% leh 14.55% ve ve niin Rs.7 a tihhniam a nih thu a sawi a. “Tunah hian Petrol man hi Rs. 99.24-ah tihsan a nih pawhin kum 2021-a Petrol man tihhniam a nih hmaa kan pek thin Rs.107.12 kha Rs.7.97 in kan la pha chuang lova. Chutiang bawkin Diesel man hi Rs. 88.02 ah tihsan a nih chuan kum 2021 a Diesel man tihhniam a nih hmaa kan pek thin Rs. 97.89 kha Rs.9.87 in kan pha ta chuang lo,” a ti bawk.

Chhiah ti sang lo thei lo dinhmunah an din thu Minister chuan sawiin, “Mizoram mipuite bakah lirtheia eizawngte pawhin he kan hmalakna hi min hrethiam a, harsatna min siam sak lo hram turin ka ngen che u,” a ti a ni.