Kumin ah Heroin kg. 93.105 man ni tawhin ruihhlo vangin mi 52 an thi tawh nia chhinchhiah a ni

Mizoram Police leh Excise & Narcotics Department-ten kumin thla 8 chhunga Heroin an man belhkhawm chu kg. 93 leh gram 105 a tling a. Mizoram-ah kumin chhungin ruihhlo vanga thi mi 52 awm tawhin, kum 1984 atanga kumin thlenga ruihhlo vanga thi chhinchhiah tawh zat chu mi 1,862 an tling tawh bawk.

Mizoram Police leh Excise & Narcotics Department hotute sawi danin kumin January thla atanga August thla tawp thlenga Heroin an man belhkhawm hi kg. 93.105 zet tlingin hemi chhung vek hian Methamphetamine kg. 409 leh gram 425 an man bakah Ganja kg. 732 leh gram 18 an man bawk a ni. Kumin January leh August thla inkar chhunga Police bikin Heroin an man chu kg. 59 leh gram 250 a ni a, a hlutna hi cheng vbc. 17.77 chuang niin an chhut a. Hemi hun chhunga Methamphetamine kg 285 leh gram 99 an man chu cheng vbc. 37.18 hu dawn a ni a. Crystal Meth kg 35 leh gram 155 manin a hlut zawng hi cheng vbc. 105.46 chuang hu nia chhut a ni bawk.

Nikum 2023 kha Mizoram-a kum khata ruihhlo man tam ber kum a ni a, Police leh END te Heroin man belhkhawm chu kg. 144 leh gram 113 a tling a. Methamphetamine hi nikum khan Police leh END hian kg. 253 leh gram 678 an man bawk a. Nikuma Police-in Crystal Meth an man chu kg. 49 leh gram nga a ni a, a hun lai khan cheng vbc. 147.01 hu anga chhut a ni. Nikum chhung khan ‘Narcotic Drugs and Psychotropic Substances (ND&PS) Act, 1985’ hmangin thubuai 725 an ziaklut a, mi 1,088 manin nikuma ruihhlo leh zu vanga an man zinga 83 chu ramdang mi an ni.

Hetihlai hian Mizoram-ah kumin chhungin ruihhlo vanga thi mi 52 an awm tawh nia chhin-chhiah niin kumin (January-September 6 thleng) a ruihhlo vanga Mizoram-a thi chhinchhiah te hi mipa 45 leh hmeichhia pasarih, an vaiin mi 52 an ni a. Kum 1984 atanga kumin thlenga ruihhlo thihpui tawh chhinchhiah chu mipa 1,636 leh hmeichhia 226, an vaiin mi 1,862 an ni.

Tunlai hian tleirawl zingah Ganja hman ching an awm nia sawi a ni a, Ganja phurh kual, neih, kawl, zawrh leh hman te bakah In bul huan emaw, Lo lama Ganja chin chu ND&PS Act 1985 tlawhchhana thubuai lian tak neih theihna a nih avangin Ganja laka fihlim turin mipuite an hriattir bawk.