Empanelled Survey Firms a thlante lakluh an ni

Revenue Department-in ram teh leh thildang a Surveyor indaihlohna phuhru tura Empanelled Survey Firms a thlante chu chhawr tangkai theih turin Home Minister K. Sapdanga'n a lalut.

Hemi puala inkhawm Zirtawpni kalta tlai-a Aijal Club-a neih ah Home Minister chuan Empanelled Survey Firms hmang hian harsatna tam tak sutkian in a awm dawn ta tih sawiin, “Hnung lam hawia sawrkar kal thin khan Vawiin atang chuan hmalam a pan dawn ta niin ka hria a, a lawmawm hle,” a ti a. “Sawrkar hausakna chu chhiah atangin a ni a, sawrkar hausa lo atangin mipui hausa a awm hlei thei lova, sawrkar a hausak chuan mipui pawh hi a hausa dawn a ni,” a ti a. “Property Tax te kan han pe ve chho ta a, kan chawi loh tur chawi emaw intia Chhiah kan pek hian rilru a na thin a, kan hmasawnna tura pe kan ni tih kan hriat hian kan rilru pawh a nuam thin,” a ti a. Empanelled firms te chu sum siamna atan ni lo, ram siam thatna atana ke pen turin an beisei tih a sawi bawk.

He hunah hian Revenue Minister B. Lalchhanzova pawhin Empanelled firms hi sawrkar hmasa hun atanga ruahmanna lo awm tawh a ni tih sawiin, “Vawiin-ah Firms 13 te nen kan thawkho dawn a, tha tak leh rinawm taka thawk turin ka ngen che u a ni,” a ti a. Land Revenue Department te mipui lamin dawr khirh tak, biak har tak anga an sawi ?tin te chu a theih ang anga nawhreh an tum thu sawiin, “Chutiang tur chuan nasa takin kan inbuatsaih zel dawn a ni,” a ti bawk.

He hun hi Dr. H. Lalthlangliana MCS, Secretary to the Govt. of Mizoram LR&S Department chuan kaihruaiin Land Revenue & Settlement Department-a Director V. Lalduhzuala chuan Technical Report pein he hmalakna hi a sawifiah bawk a ni.