Kum sawm chhungin Mizoram-ah mahni intihlum mi 948 zet an awm nia chhinchhiah a ni

Kum 10 kalta chhung khan Mizoram-ah mahni intihlum mi 948 an awm tawh nia chhinchhiah a ni a. Kumin bikah hian mahni intihhlumna hi tum 49 thleng tawhin Mizoram-a mahni intihlum zingah hian thalai, kum 20 leh 30 inkar chu a tam ber an ni.

Mahni intihhlumna hluar zel laka invenna leh inzirtirna ni, ‘World Suicide Prevention Day’ chu nimin September 10, 2024 khan hmun hrang hrangah hman a ni a, Aizawl-ah pawh National Mental Health Programme bultumin nimin khan DHME Auditorium-ah he ni pual hian hun hman a ni a, he hunah hian Aizawl SP Rahul Alwal chuan Mizoram-ah hian kum 2014 atanga kumin 2024 (July) thleng khan mahni intihlum mi 948 an awm tih chhinchhiah a nih thu sawiin, chung zinga mi 794 te chu mipa an nih thu leh mi 154 te chu hmeichhia an nih thu a sawi a. Data-in a tarlan danin mahni intihhlumna hi kum 20-39 inkarah an tam ber a, mi 584 zet niin a dawtah kum 40-69 inkar tam lehin mi 201 an awm a, kum 1 atanga 19 inkarah mi 117 zet an awm bawk a; kum 60 chunglam ah mi 41 an awm bawk.

Kumin bikah hian mahni intihhlumna hi tum 49 a thleng tawh a ni. Zirchianna in a tarlan danin mahni intihhlum percentage hi mipa 84% niin hmeichhia 16% an ni. Mizoram-ah hian kum 9 atanga kum 90 thlengin mahni intihhlumna hi a thleng ni a chhut a ni bawk.

Mahni intihhlum tum mi beidawngte lo dawngsawnga, an harsatna leh buaina ngaihthlaksak tura Helpline TeleMANAS chungchang pawh he hunah hian tarlan a ni bawk a, TeleMANAS Helpline No. 14416 leh 18008914416 hmanga Counsellor leh thawktu dangte englai pawha biak pawh theih an ni. Anni bakah hian ARDSI Mizoram Helpline7005983633 leh 9366191341-ah te pawh biak theih reng a ni bawk.

World Suicide Prevention Day puala hun hman hi Health and Family Welfare Joint Secretary Lalnunmawii Ralte chuan hmanpuiin mahni intihhlum duhna chu Mizoram-ah a hluar chho mek a ni, a ti a, chung ngaihtuahna chu rilru lam natna-in a hrinchhuah a ni tih hriat tchian a pawimawh a, mitin ten mahni bula awm, an chenpuite emaw, an thian leh lam hlaa awm pawh nise, an chetzia leh khawsak phungah danglamna a awm leh awm loh thlithlai ngun a pawimawh thu a sawi a. Mahni intihhlum duhna mitin nunah a thlen loh nan rilru sukthlek te a eng zawnga herrem a, harsatna tawhte hnehtu ni thei tura intih chhel a ngaih thu a sawi bawk.